Гараа зөөлөн, сайхан байлгахын тул юуг анхаарвал зохих вэ? Юуны өмнө бүлээн усаар гар нүүрийн савангаар угаана. Бүр бохирдсон гар, хумсанд байгаа хирийг арилгах тусгай сойзоор угаана.
Хэрэв гар хуурайшиж эвэршвэл гараа их савантай бүлээн усаар шавшаад, дараа нь буцламтгай болон хүйтэн усанд дүрнэ. Тэгээд ширүүн сойзоор эврийг нь үрээд, тос түрхэнэ. Ингэж хэд хэдэн удаа засал хийсний дараагаар эвэр алга болдог.
Ялангуяа өвөл гараа сайтар арчлах нь чухал. Их хүйтэнд гадаа ажилладаг тамирчин, тойрон аялагч, цаначин зэрэг хүмүүс хөлдөхөөс сэргийлэн гартаа галууны өөх түрхэж болох юм. Бээрсэн гарыг цасаар үрж болохгүй. Арьсны гадна талын чийг ууршингаа арьсыг хув хуурай болгоод хагарахад хүргэдэг.
Гарын алга хөлрөхийг багасгахын тул угаах усандаа /литр усанд/ нэг цайны халбага байхаар бодож нашатырын спирт хийх хэрэгтэй. Тэгэхэд нэмэргүй бол гараа өдөрт 2 удаа цууны хүчилтэй хүйтэн усанд дүрнэ.
Гар сайхан байх нь хумснаас их шалтгаална. Байнга юм угаадгаас болж хумс хугарамтгай болдог. Ийм үед угаасныхаа дараа гарын арьс, хумсаа 10-15 г хоолны цуу, 20 г глицеринийг 40 г устай найруулсан уусмалаар арчих хэрэгтэй. Унтахдаа хумсандаа ямар нэг тос түрхэнэ.
Хумсаа яаж цэвэрлэх вэ? Их урт хумсыг хуурайгаар богиносгоно. Хумсныхаа хэлбэрийг өөрийн ажил мэргэжлийн шаардлагын дагуу сонгож авах хэрэгтэй юм. Ямар ч гарт таарах хумсны хэлбэр гэж байхгүй л дээ. Хумс тийм ч урт биш, тэгэхдээ бас тийм ч богино биш, зуувандуу байх нь зүгээр. Хуруунаас 3-4 мм урт байхад л хангалттай, хугарах ч үгүй. Дэндүү лав авсан юм уу, хуурайдсан хумс хурууг хамгаалж чадахгүй хэлбэрийг нь өөрчилж, богинохон юм шиг харагдуулна.
Хумсаа хүссэн хэлбэрээрээ засчихаад, хурууныхаа үзүүрүүдийг 5-7 минут савантай халуун усанд дүрнэ. Дараа нь цэвэр алчуураар арчаад хумсаа тосолно. Зөөлөрсөн, хумсныхаа махыг зориулалтын мохоо хутгаар сөргүүлж, дараа нь махир хайч, эсвэл чимхүүрээр авна.
Хумсны толионд ч тэжээллэг тосоор иллэг хийхэд цусны эргэлт сайжирч хумс ч илүү тэжээл авах талтай юм.
Хумсаа бэхжүүлэхийн тул долоо хоногт нэг удаа хуруунуудаа чидэн жимсний тосонд дүрж байгаарай.
Резинэн бээлийг байнга хэрэглэж сур. Сав суулга цэвэрлэдэг болон угаалгын нунтаг нь тослогийн өнгөн давхрааг арилгах учир хумсыг зөөлрүүлчихдэг.
Тамхи татдаг хүмүүсийн хуруу никотинд шарладаг. Ийм үед жаахан нимбэгээр арчиж болно.
Хумсанд хонь гарах нь бие махбодод төмөр болон витамин дутагдсанаас болж болох бөгөөд мөн хумсаа буруу янзалснаас ч болж болно.
Хэзээ ч бөглөө таглааг хумсаараа онгойлгох хэрэггүй.
Заримдаа лакадсан хумсан дээр цэврүү үүсдэг. Энэ нь нэг бол лакдахынхаа өмнө лакаа сайн сэгсрээгүйгээс, эсвэл хатаахдаа гараа хамаагүй сэгсчсэнээс болдог.