Yсний гялалзсан сайхан өнгө, уян хатан чанарыг алдуулахгүй, унагаж шингэрүүлэхгүйн тулд юуны өмнө эрүүл мэнд, мэдрэлийн системийн ерөнхий горимыг анхаарч, өдрийн зөв дэглэм сахиж, витамин ихтэй хоол идэж, тогтмол цагт унтах хэрэгтэй. Түүнээс гадна үсээ зөв арчилж тордох нь чухал байдаг.
Yс эрүүл бөгөөд бөх бол тусгай сойзоор өдөр бүр 5 минутын турш самнаж цэвэрлэж болно. Ингэхэд сойз үсний тосыг аваад зогсохгүй, хуйхны цусны эргэлтийг сайжруулан, үсний тэжээл ихсэж үс жинхэнэ өнгөөрөө гялалздаг бөгөөд гоо сайхны ямар ч бодис ийнхүү тус болж чадахгүй. Өтгөн үсийг ширүүн сойзоор, харин хэврэг, хугарамтгай үсийг зөөлөн сойзоор самнана.
Yс самнахдаа ургах дагуу буюу үсний голоос чих, шанааны чиглэлээр самнана.
Yсний самыг шүдний сойз шиг хувь хүн ганцаараа эдлэх хэрэгтэй. Хуйхаа шалбалахгүйн тулд хэтэрхий хурц үзүүртэй биш, хуванцар сам хэрэглэвэл зүйтэй. Мэдээжээр сам, сойзоо байнга угааж, цэвэрхэн байлгавал зохино.
Самнах, ялангуяа ширэлдүүлж самнах явдал үсний байдалд нөлөөлж болно. Yсийг байнга ширэлдүүлэн самнадаг бол үс хэврэг болж, үзүүр нь салаалж унадаг.
Хиймэл үс удаан хугацаагаар тогтмол өмсвөл үсний үндэсний тэжээл авах явыг алдагдуулж, унахад хүргэнэ.
Гэзгийг хэтэрхий чанга сүлжих хэрэггүй.
Yсийг агаар салхинд ил байлгах нь сайн боловч нарны гэрлээс хамгаалах хэрэгтэй. Ялангуяа үсний будаг нарны гэрлийн нөлөөгөөр хуйх үрэвсүүлж болзошгүй тул будсан үсийг нарны гэрлээс хамгаалж байвал зохино.
Yсийг давс хужир багатай зөөлөн усаар угаавал сайн байдаг. Хуурай үсийг 10-12 хоногт 1 удаа угаах хэрэгтэй. Тэгэхгүй бол үсний тослог улам багасаж, хугарч, салаалах нь ихэсдэг. Мөн химийн буржийлгыг жилд нэгээс илүү хийлгэж хэрэггүй.
Yсээ химийн будгаар будъя гэвэл зааврыг нь чанд дагахыг хичээгтүн. Yсчинд л үсийг зохих журмаар буддаг.
Тослог үсийг 5-7 хоногт нэг удаа угааж бай. Тослог үсэнд шинэхэн багваахай цэцгийн навч, хад жимсний шингэн чанамал ашигтай. Түүнийг хуйхандаа түрхэж, нимгэн хальсан алчуураар толгойгоо боогоод 10 минут болсны дараа үсээ самна.
Олон зүйл хоолноос шалтгаалдгийг мартаж болохгүй. Гахай, хонины мах, хурц хоол, кофе, какао, шоколад, янз бүрийн халуун ногоо, согтууруулах ундаа зэрэг нь өөх тос ялгаруулах явыг идэвхжүүлдэг. Уураг, витамин ихтэй /хүнсний ногоо, жимсгэнэ, сүү, аарц, чанасан хар мах/ зүйл нь өөх тос ялгаруулалтыг хэвийн байлгадаг.
Хүний үс насан туршид нь унаж, нөхөн ургадаг бөгөөд 14-17 насанд хамгийн урт ургадаг. Харин сүүлдээ ургах нь удааширч, үсний ширхэг нарийсдаг. Энэ бол байгалийн жам юм. Гэтэл самнах үед 20-30-аас илүү үс унаж, хаг ихсэж, үс гялалзсан өнгө, уян чанараа алдвал эмчид үзүүлэх хэрэгтэй.
Yс унаж хугараад байвал эртхэн шиг богино тайруулбал зохино. Тэгвэл үсээ ариглаж, эмчлэхэд хялбар дөхөм болно.
Yсээ халуун наранд, тэр тусмаа цахилгаан зуухаар төөнөн хатааж болохгүй.
Хүйтний улиралд толгой нүцгэн явж болохгүй, тэгвэл үс унана.
Зуны хурц наранд нимгэн малгай өмсөж, эсвэл шүхэр барьж яв.
Дулаан бороо, манан үсийг сайхан болгодог.