Yсээ үргэлж илээрэй
Өглөө сэрээд 10 хуруугаараа үсээ самнах маягаар хойш урагш илээрэй. Ингэснээр толгойн мэдрэлийн цэгүүд хурууны өндгөөр цочирч, толгой тархи, оюун ухаан сэргэж, даралт буурч, урам зориг нэмэгдэнэ. Толгой эргэх, өвдөх, хуйх загатнах, үс унах, зүрх дэлсэх, мэдрэл ядрахаас урьдчилан сэргийлнэ.

Нүдний дасгал
Санаа сэтгэлээ тайвшруулан, нүдээ хагас аниад нар зөв, нар буруу баруун зүүн, дээш доош аажуухан эргэлдүүлнэ. Дараа нь нүдээ огцом нээж дээрх үйлдлийг давтана. Ингэхэд нүдний ядаргаа, чилээг гаргаж, харааг хурцлах, толгой эргэх, нүд эрээлжлэх болон нүдний бусад эмгэгээс сэргийлнэ.

Хэлээ түүшиндээ хүргэх
Хэлний үзүүрийг дээш болгон тагнайн хонхорхойд хүргэж дээш доош, хоёр тийш эргэлдүүлэн хөдөлгөхөд шүлс элбэгшинэ. Энэ дасгал хоолны дуршлыг өдөөж, шингэцэд сайнаар нөлөөлнө. Ам аргах, залгиур хоолой, буйлны үрэвслээс сэргийлнэ.

Шүлсээ залгих ашигтай
Завьжаараа шүлсээ сорж ам дүүрэхэд 10 хувааж залгина. Yүгээр хоолны шингэц сайжирч залгиурын ажиллагаа идэвхжин, биеийн эсэргүүцэл нэмэгдэнэ.

Шүдээ товш
Уруулаа жимийж, анхаарлаа төвлөрүүлээд араагаа, дараа нь үүдэн шүд, соёогоо тэгш зуугаад товшино. Шүдний өвчнөөс сэргийлж, шүдийг бэхжүүлнэ.

Дагзаа нясалж бай
Хоёр гарынхаа алгаар чихээ таглан дарж, долоовор хуруугаа дунд хуруун дээр тавьж, чихний ар дагзанд 36 удаа няслах үйлдэл хийгээд чихээ тагласан гараа огцом авч, буцаан дарах хөдөлгөөнийг 16 удаа хийнэ. Ингэснээр толгой тархи сэргэж тогтоох, санах ой ухаан, сонсгол сайжирна. Толгой эргэх, өвдөх, чих шуугих болон чихний элдэв үрэвсэл эмгэгээс сэргийлнэ.

Морь харах-даа бүү ярь
Морь харах үедээ амаа хамхиж, шүдээзууж, хэлний үзүүрийг тагнайн хонхорт хүргэнэ. Тамхи татах, үг ярихыг цээрлэ. Энэ нь шүдийг бэхжүүлнэ.

Өглөө бүр эвшээ
Өглөө бүр хамраараа агаар татан хэвлий дүүргээд толгойгоо өргөн амаа ангайлган эвшээж амьсгалаа гаргана. Энэ дасгалыг 12 удаа хийвэл уушгины үйл ажиллагаа сайжирч, зүрх уушигны цусан хангамж нэмэгдэн, цээж давчдах, багтрах, бүгшүүлж ханиалгахаас сэргийлнэ.

Yе мөчөө хөдөлгө
Гараа мөрөөрөө хойш урагш савчин, бас эргүүлж, хөлөөрөө хойш урагш мөн өшиглөх, савчих маягаар булчин шөрмөсөө цочроон тэнийлгэ. Мөн бүсэлхий, ууц нуруугаараа гэдийж бөхийж хоёр тийш болж, хуян шар усаа тарааснаар үе мөчний өвчин тусахгүй.

Нуруугаа дулаан байлга
Нуруугаа цаг агаарын байдалд тохируулан дулаан байлгах хэрэгтэй. Түүнчлэн алгаа үрж бүлээцүүлээд ууц бүсэлхийгээ олон дахин илж байвал нуруу хөшиж өвдөх, хэвлийн хөндийн янз бүрийн өвчин тусахаас сэргийлнэ.

Нүүрээ байнга илж бай
Гарын алгаа хооронд нь үрж халаагаад дух, хацар самсаагаа бүхэлд нь дээш доош хэдэн удаа зугуухан илнэ. Өдөрт хоёр удаа хийхэд илүүдэхгүй. Энэ нь үрчлээг багасгах ба нэмж үрчлээтэхээс сэргийлнэ. Хамтар битүүрэх, ханиад хүрэх, салхинд нулимсгоожих, толгой, шүд өвдөхөөс сэргийлнэ. Харин батгатай хүмүүс хийж болохгүй.

Арьсаа илж бай
Биеийнхээ арьсыг хэсэгчлэн боломжоороо 10 орчим удаа зөөлөн илнэ. Ингэснээр арьсны нүх сүвүүд тэлж ядаргаа арилж, нойронд сайн болно. Арьс зөөлрөн, өнгө зүс нь сайжирна.

Хэвлийгээ агшааж тат
Биеэ суллан анхаарлаа төвлөрүүлээд хамраараа амьсгал аван бага хэвлий буюу давсгаа зугуухан агшааж тат. Энэ байдлаар хэсэг барьсны дараа амьсгалаа гарган биеэ суллана. Энэ дасгалыг 10-аас доошгүй удаа хийж болно. Давсаг, бөөрний үйл ажиллагаа сайжирдаг.

Цээжээ арчиж бай
Цээжиндаа байнга иллэг хийж зөөлөн алгадах хөдөлгөөнийг өдөрт хэдэн ч удаа хийж болно. Ингэснээр зүрхний үйл ажиллагаа сайжран, цээж давчдах, зүрх дэлсэх, зүрхний титэм судас өвчлөхөөс сэргийлнэ.

Хэвлийдээ иллэг хийх
Орондоо байхдаа хүйсээ тойруулан зөөлөн иллэг хийнэ. Хоёр тал руугаа ээлжлэх ба зөөлөн дарж базална. Нийт арав арван удаа давтана. Энэ дасгал нь гэдэс ходоодны ажиллагааг сайжруулан, өтгөн хатах, гүйлгэх, бүдүүн нарийн гэдэсний архаг үрэвсэл, шээс тасалдах өвчнүүдээс сэргийлнэ.

Хөлийн улаа илэх
Алгаа хооронд нь үрж бүлээцүүлээд хөлийн тавхайн тус газарт 10 удаа илж дарвал хөл дулаацан, элэг бөөрний үйл ажиллагааг сайжруулан, өтгөн хатах, гүйлгэх, бүдүүн нарийн гэдэсний архаг үрэвсэл, шээс тасалдах өвчнүүдээс сэргийлнэ.