Эцэг эхчүүд хүүхдийнхээ тархинаас гутранги үзлийг арчин хаях үүрэгтэй. Ээж нь ажлаасаа ирээд ажил төрөл, хамт олон ба даргаа муулж ядарснаа гайхаад байвал хүүхэд нь ирээдүйд саятан болохгүй. Хүүхдээ сайн хүн болгохын тулд хүүхдийн дэргэд ярьж байгаа үг хэл бүрээ хоёр дахин хянах учиртай. Бие муу байсан ч хүүхдийн дэргэд хэлэх хэрэггүй. Өнөөдөр өвдөөд муу байна гэхийн оронд Өнөөдөр нэг их сайн биш боловч гайгүй байнаа гэж ярьж сур. Энэ нь хүүхдийн тархинд шууд зоогдож том болоод өвчнийг яг ингэж хүлээж авдаг хүн болно.
Мөн багаас нь хүүхдийн амжилт бүрийг нь заавал урамшуулж байгаарай. Сайхан үгс, магтаал сайшаал, эерэг бодол санаа нь хүүхдэд том болоод баяжиж дэвжих, цэцэглэн хөгжихийн үр юм. Харин бүдүүлэг муухай үгс, зовлон тоочсон яриа, уур хилэн, хүүхдийг загнаж айлгах явдал, дорой гутранги санаа бодлоор цэнэглэгдсэн хүүхэд бол ирээдүйн хог өвс билээ. Хүүхдийн тархи хэмээх цэцэрлэгт хүрээлэнд цэцэг, хог өвс хоёрын алины үрийг суулгах нь ганцхан эцэг эх хоёроос хамаарна.
Хэрэв хүүхэд хичээлдээ дандаа хоцроод байвал та нэг өдөр хичээл зүтгэл гарган байж цагт нь гаргаж өгөөд дээр нь урамшуулах замаар энэ хог өвсийн үндсийг тасалж хаяна. Цаг яс барьдаг зан ирээдүйн саятны төмөр чанар.
Ер нь боломж гарах бүрт хүүхдийг заавал магт. Түүнийг бусдаас илүү авьяастай, хүч чадалтай, давтагдашгүй гэсэн үзэл бодлыг тархинд нь хүчээр суулга. Эцэг эхийн энхрий сургамжит үгс хүүхдийн толгойд үүрд үлдэж бүх насаар нь дулаацуулж байдаг.
Бүдүүлэг үг, яриа хэл, ялангуяа хэрүүл маргаан хийх үнэхээр хэрэггүй. Энэ нь хүүхдэд хортойгоор зогсохгүй бүр аюултай. Хараал хэрүүлийн үг амнаасаа урсгадаг хүн ардын хэлээр бол нөгөө ертөнцийн чөтгөр шулмас бүхнийг даллан дуудаж тэд ирж наалдаж байдаг. Хүн бүр л сайхан гэр оронд аз жаргалтай амьдрахыг хүснэ. Хүүхэддээ ч бас ийм амьдралыг ерөөнө. Гэтэл ам хэл шал өөр юм яриад байвал та хүүхэдтэйгээ яаж аз жаргалтай амьдрах юм бэ? Мөрөөдлийн ордонд амьдрахын тулд хэрүүл хараалын үгийг арчин хаях ёстой.