Цай юуны өмнө сайхан амтаараа хүнд таалагдана. Цайны навч, түүнээс бүрдсэн цайнд кофеин, теофамин, теофиллин, танин, катехины бодис, эфирийн тос, витаминууд шингэсэн байдаг. Кофеин, теобромин, теофиллины бодис нь тархины судасны тэлэлтэнд сайнаар нөлөөлдөг бөгөөд энэ нь мэдрэлийн ядаргааг арилгахад нэмэр болно.
Мөн цай нь хөлс гаргах хэрэглүүр бөгөөд ханиад томуу хүрэх, салхинд цохиулахад цай уухыг зөвлөдөг. Цайнд байдаг танин, катехины бодис нь бас хүний бие махбодид сайн нөлөөтэй. Катехины бодис нь Р витаминыг идэвхжүүлэх чадвартай гэдэг нь нотлогдсон бөгөөд нарийн судасны ханыг бэхжүүлнэ. Катехины бодис нь судас шохойжих процесст саад болдог. Катехин их байдаг ногоон цай бол олон сайн талтай. Тэрээр цангааг сайн гаргана. Иймээс халуун улиралтай нутгууд энэ цайг их хэрэглэдэг. Ногоон цай нь зүрх судасны системд ус, давсны солилцоо, бөөрний ажиллагаанд сайнаар нөлөөлөхөөс гадна цусны төлжилтийг сайжруулна.
Дээр үеэс ард түмэн цайг амьдралын тэтгэгч бодис гэж нэрлэж байсан. Гэвч энэ нь цайг хязгааргүй их ууж болно гэсэн үг биш. Нэгдүгээрт, хэрэв цай их уувал зүрх судас, бөөрний ажиллагааг хүндрүүлнэ. Энэ нь биемахбодод сайн нөлөөлөхгүй. Хоёрдугаарт, цайнд байдаг кофеин нь мэдрэлийн системийг сэргээж зүрхний цохилтын ритмийг эвдэж артерийн даралтыг нэмэгдүүлж болох учир өтгөн цайг их ууж болохгүй. Унтахын өмнө эрүүл хүнд ч цай уухыг зөвлөхгүй.
Цайг зөв чанавал амттай, үнэртэй, ашигтай болно. Усыг удаан буцалгасны хэрэггүй, зөвхөн оргиж буцлахад л болно. Шинэ чанасан цайгаа тэр дор нь уух хэрэгтэй. Тэгэхдээ их халуунаар нь уух онцгүй.