-Хэцүү ядарсан үедээ зөвхөн өөртөө л найд. Чамаас өөр хэн ч тусалж чадахгүй, хүч хүрэхгүй.
-Зөвлөмж авахдаа хэзээ ч санаа бүү зов. Хэзээ ч бүх үнэнийг битгий ярьж бай, хэзээ ч худлаа битгий ярьж бай. Хууртагдсан хүнийг гэнэн гэдэг бол хуурсан хүнийг нь үзэн яддаг.
-Хэзээ ч битгий гөжиж бай. Гөжих нь зөвхөн мулгуу хүнд байдаг.
-Хэн ч өөрийгөө тэнэг гэж боддоггүй. Гэхдээ хичнээн өөрийгөө магтана, тэр хэмжээгээр тэнэг байдаг.
-Ухаалаг хүн юмны сайныг олж хардаг бөгөөд сайн үйлс бүтээхэд ямар хэцүүг мэддэг бол тэнэг хүн сайн үйлийг мэддэггүй бөгөөд хүний сайн талыг олж хардаггүй.
-Нэг тэнэг зүйлээ нуух гэж хоёр дахь тэнэглэл рүү орох хэрэггүй.
-Барын арьс өмсөж чадахгүй бол үнэгний арьс өмсөх нь зүйтэй. /хүч чадалгүй бол залиар/ Зарим тохиолдолд эртхэн бууж өгвөл ялагчаар үлддэг. Хүч хүрэхгүй юманд ухаан шаардагддаг. Ер нь заль мэх нь хүчээ байнга дийлж ирсэн.
-Амьдралын ухаан нь аливаа юмны ашигтай, олз омог олохдоо байдаг.
-Аливаа юманд болгоомжтой ханд. Чи ганцаараа, харин дайсан чинь олуулаа гэдгийг битгий март. Хүний муу талыг олж харсан бол битгий баярла, битгий шүүмжил. Муу юм хэлэхэд тэрнээс дор юм өөрийнхөө тухай чи сонсох болно.
-Ер нь хов жив ярьдаг хүнийг хүн үзэн яддаг бөгөөд хов жив зөөлөө гээд хүмүүс баярладаггүй, харин ч чимээгүй сонсчихоод өөрийг чинь үзэн ядах болно.
-Хүнээс юм гуйж чаддаг бай. Зарим хүнд энэнээс амархан юм байдаггүй, зарим хүнд үүнээс хэцүү юм байдаггүй. Харин хүмүүс юмаа харамлаж чаддаггүй, зарим нь нүгэлтэй харамч байдаг. Тийм хүмүүсийн аргыг нь олох хэрэгтэй. Чиний нүдэн дээр нэг хүнд үгүй гэж хэлсэн бол битгий чи гуй. Чамд бас үгүй гэж амархан хэлж чадна. Хамгийн дөхөм арга бол түүнд тусла, дараа нь гуйвал амар.
-Аливаа юманд дүгнэлт өгөхдөө зөвхөн өөрийнхөө хар толгойгоор гарга. Бусдад таалагдаж байгаа юм чамд таалагдахгүй байж болно. Энэ нь өөрийн гэсэн ухаантай гэдгийн баталгаа.
-Жаахан ч муу зүйлийг үл тоомсорлож болохгүй. Гай ганцаараа ирдэггүй гэдгийг санагтун. Бүдрэх нь юу ч биш гэж бодоход хальтарч унавал хаашаа юунд хүрэх нь чөтгөр бүү мэд.
-Сайн үйлс хүнд хийхдээ ухаалаг, аажмаар бага багаар хийх хэрэгтэй. Хэт сайн үйлсийн эцэст нөхөрлөлийн холбоо тасрахад хүрч магад. Яагаад гэвэл хэт их туслалцааны хариуг өгч чадахгүйгээсээ болж хүмүүс холддог байна.
-Уурлаж чаддаггүй хүмүүс зүрхгүйтэй адил. Ер нь мэдрэмж муутай хүмүүс уурлаж чаддаггүй. Амьдралд бол уурлах шаардлага гардаг.
-Шинэ дээрээ нэр нүүрээ олж ав. Шинэхэн орж ирсэн хүн хуучин нэр хүндтэй хүнээс илүү үнэ цэнэтэй байдаг. Нэг хоёр өдрийн дараа бусдын адил болох учир анхаарал татсан дээрээ юу хийж чаддагаа үзүүлж нэр хүнд олж авах нь чухал.
-Бусдад таалагдаж байгаа юмыг битгий шүүмжил. Ямар нэгэн гоё юм байгаад л бусад чинь таалсан хэрэг. Ингэснээр тус болохгүй нь мэдээж. Юмны сайхныг олж харж чадахгүй бол дуугүй байсан дээр. Яагаад гэвэл энэ нь мэддэггүйн баталгаа болдог.
-Ямар нэгэн муухан гадарлаж байгаа юман дээр дуугүй байх нь зөв. Ингэснээр чамайг мэддэггүйд тооцохгүй ч боловсонд тооцох болно.
-Хүнтэй харьцахдаа хүнийг царайны өнгөөр нь таньж сур. Хүйтэн царайтай хүн хэзээ ч хүнийг ойлгож хүндэтгэдэггүй. Хөөрхнийхөө хэрээр хөнгөн байдаг гэх мэт.
-Хамт олны дунд ихэмсэг зан гаргах хэрэггүй. Ингэснээр чамайг тэд хүндлэхгүй.
-Олны дунд өөрийгөө харуулахад урлаг, ухаан хэрэгтэй. Гоо үзэмжээ харуулахад ч ухаан шаардагддаг. Гоо үзэмжээ харуулах гэж байгаад доог болох ч байдаг. Энэ бүх урлаг нь зөвхөн ухаанд л байдаг билээ.
-Бусдад хүндлүүлэхийн тулд өөрийгөө хүндэлж сур. Хаана чамайг хүндэлж байна тэр газраа л оч. Хүндлүүлэхийг бодож байвал өөрийг чинь ямар нэгэн юманд дуудахаар л очих нь зөв бөгөөд талархлаа илэрхийлээд түрүүлж өөрөө гарах нь зүйтэй.
-Металлыг дуугаар нь таньж, хүнийг үгээр нь дүгнэдэг.
-Сандруу биш ажил хэрэгч хүн бай. Зарим хүн маш ажил хэрэгч царайлдаг. Хий сандрал амжилтанд хүрэхгүй. Харин ажил хэргээрээ бахархах хэрэгтэй, тэгвэл хүмүүс чамайг магтана.