Эр бэлэг эрхтэн, ялангуяа тээрхийн арын ховилд тосны булчирхай байдгаас байнга тосорхог өнгөртэй байдаг. Энэ нь үтрээнд орж улмаар үрэвсэл үүсгэн умайн хүзүүний хорт хавдартай болоход нөлөөлдөг болохыг эрдэмтэд судалгаагаар тогтоосон. Иймээс бэлэг эрхтэнээ зөвхөн эмэгтэй хүн л угаах ёстой гэж ойлгож болохгүй. Нэг нь угаах зэргээр ариун цэвэр сахиад, нөгөө нь сахихгүй бол бэлгийн ариун цэвэр сайн байна гэх үндэсгүй учраас эрэгтэй хүн ч байнга угаалга хийх шаардлагатай.
– Хамгаалалтгүй бэлгийн харьцаанд орсны дараа шууд марганцтай усаар угаачихвал санаа зоволтгүй гэх юм. Энэ үнэн үү?
– Ер нь жирэмслэлтээс урьдчилан сэргийлэх үндсэн арга байдаг. Yүний нэг нь механик арга юм. Механик буюу уламжлалт энэ аргад бэлгийн харьцаанд орсны дараа үтрээг угаах арга багтдаг. Хурьцлын ажлаа дөнгөж дуусмагц эмэгтэй нь тусгай зориулалтын бургуйгаар хүчиллэг уусмалаар үтрээгээ шууд угаана. Гэвч энэ нь найдвартай арга биш. БЗХӨ-өөс сэргийлж чадахгүй. Түүнээс гадна үтрээний өөрийн хамгаалах орчинг устгах бөгөөд олон удаа угаавал үрэвсэлт өвчинтэй болгоно.
– Эмэгтэй хүний цэвэршилт эрт эхэлж буйг мэдэх анхны ямар шинж тэмдэг байна вэ?
– Эмэгтэй хүн цэвэршинэ гэдэг нь биений юм ирэхээ больж, жирэмсэн болохгүй гэсэн үг л дээ. Эрхтэн тогтолцооны болон эмэгтэйчүүдийн ямар нэг өвчингүй эмэгтэйчүүдэд онцын шинж тэмдэг илэрдэггүй. Цэвэршилт эрт эхэлж буйг мэдэх анхны шинж тэмдгүүд нь биений юм их, багаар ирэх, хугацаа нь алдагдах зэргээр тогтворгүй болно. Бас толгой өвдөх, ядрах, хөлрөх, нүүр халуу оргих зэрэг зовиурууд илэрч, сэтгэл санаа тогтворгүй болж болох юм. Хэрэв дээрх шинж тэмдгүүд илэрвэл эмэгтэйчүүдийн эмчид хандаж зөвлөгөө авах хэрэгтэй.
– Гар хангалга хийх үед БЗХӨ-ний халдвар авах уу?
– БЗХӨ нь бэлгийн замаас гадна ахуйн хавьтлын замаар ч халдварладаг. Гар хангалга хийх үед тухайн ор дэр зэрэг орчны бохир байдал, гараа угаагаагүй, урт хумстай байх зэрэг нь нөлөөлж, халдвар авахыг үгүйсгэх аргагүй. Хэрэв гар хангалга хийх зайлшгүй шаардлага тохиолдвол цэвэр орчинд гараа сайн угаасны дараа хийх хэрэгтэй.
– Саяхан би мазокын шинжилгээ өгсөн юм. Гэтэл бактеритэй гэсэн хариу гарсан. Бактери юунаас бий болдог юм бэ?
– Yтрээний наацын шинжилгээнд бактери гарна гэдэг нь та бэлгийн замын ямар нэг үрэвсэлт өвчинтэй байна гэсэн үг. Тиймээс эмчтэйгээ яаран уулзаж ямар төрлийн бактери байгааг илрүүлэх шинжилгээг давтан өгч, оношоо зөв тодруулж тууштай эмчлүүлэхийг зөвлөе.
– Мөөгөнцрийг антибиотек удаан хугацаагаар хэрэглэснээс үүсдэг гэж сонссон. Гэтэл би сүүлийн хэдэн жил антибиотек ердөө хэрэглээгүй байтал мазокны шинжилгээгээр мөөгөнцөр илэрсэн байх юм. Өөр үүсвэр байна уу?
– Мөөгөнцөр нь антибиотек удаан хэрэглэхээс гадна өөр үүсвэртэй байж болно. Жишээлбэл эмэгтэй хүн үтрээгээ өдөр бүр угаадаг бол өөрийнх нь хэвийн бичил орчинг устгасны улмаас мөөгөнцөр үүсч болно. Бас ямар нэг харшлын гаралтай өвчний шинж тэмдэг маягаар ч илэрч болох талтай. Өөр бусад эм, архи пивоноос ч шалтгаалан мөөгөнцөр үүсэхийг үгүйсгэх аргагүй.