Саам уух үедээ хоолныхоо дэглэмийг өөрчлөхгүй байвал 1-2 кг, бүр үүнээс ч илүү таргалж болох гэнэ. Учир нь гүүний саам уураг, амин дэээр баялаг бөгөөд 100 граммд л гэхэд 53 ккал илчлэг байдаг юм байна. Мөн арьсны тэжээллэг чанарыг сайжруулдаг боохоор саам ууснаар зүс царай өнгөлөг сайхан харагддаг аж.
Бид зун хааяа хөдөө гарахдаа гүүний саам таарвал аяга аягаар нь залгилчихдаг. Түүнээс болж гэдэс хямрахыг дотоод эрхтэн цэвэршиж байна гэлцдэг. Энэ нь саамны эмчилгээ болон хэрэглэх аргыг мэдэхгүйтэй холбоотой юм байна. Тиймээс та бүхэнд энэ тухай зөвлөе.
Саамыг улирал бүр нэг удаа 10-14 хоног уух бөгөөд өвөл хуурайшуулсан болон хөлдөөсөн саам хэрэглэж болно. Эхний өдөр өглөө, өдөр, орой тус бүр 50 гр-аар ууна. Хоёр дахь өдөр нь 100 гр гэх мэтчилэнгээр ахиулсаар 200 гр болохоор нь эмчилгээгээ дуустал уг хэмжээгээр уувал үр дүнд хүрэх аж.
Хэрэв нэгээс илүү хоногоор гэдэс чинь өвдөж, гүйлгэвэл саам уухаа зогсоох хэрэгтэй талаар мэргэжилтнүүд зөвлөж байна. Хүний биед нэн шаардлагатай тэжээллэг бодис шимэгдэлгүй шууд гадагшлах нь таныг сульдахад хүргэхийг анхаараарай. Алдагдсан эрч хүчийг эргүүлж нөхөж авахад нэлээд хугацаа шаардлагатай.
Харин саам уух үедээ айраг, архи, шар айраг ууж болохгүй. Түүнчлэн хорхог, боодогны мах, хиам идвэл эмчилгээний үр дүнд сөргөөр нөлөөлдөг гэнэ.