Үзэсгэлэнд манай нэртэй зураач урчуудын энэ онд бүтээсэн шилдэг зуу гаруй бүтээл тавигджээ.
Үзэсгэлэнг үзсэний дараа Монгол Улсын Ерөнхийлөгч хэлэхдээ зах зээлийн эдийн засагт шилжсэн сүүлийн арав гаруй жилд манай дүрслэх урлаг уг шилжилтийг өвдөг сөхрөлгүй давж гарсан салбарын нэг. Энэ бол уран бүтээлчдийн сэтгэлгээний чөлөөт байдал бий болж, туурвих, сэтгэх эрх чөлөө хязгааргүй болсонтой холбоотой. Мөн монголын урчууд өөрөө уламжлалт урлахуйн ухааны өв сантай, нарийн мэдрэмжтэй, торгон авьяастай хүмүүс учир тэр авьяас нь хөтлөж өдий зэрэгтэй явж байгаа болов уу. Үүн дээр зах зээл өөрөө эрэлт нийлүүлтийн зарчим үйлчилдэг болохоор уран бүтээлийг үзэж таашаах иргэд худалдан авах хэрэглэгчид байгаа нөхцөлд дүрслэх урлаг үүнд хөтлөгдөн хөгжиж байна.

Жилийн жилд манай уран бүтээлчдийн үзэсгэлэнг үзэхэд чанар, төрөл араг барил бүгд чамбайраад байгаа нь мэдрэгддэг. Бид энэ чадал чадвар дэвжээсэй, батжаасай гэж боддог. Үзэсгэлэнг үзэж байгаа нь төрийн зүгээс уран бүтээлчдээ олон янзаар дэмждэгийн нэг илрэл юм хэмээн онцлон хэлэв.

/МОНГОЛ УЛСЫН ЕРӨНХИЙЛӨГЧИЙН ХЭВЛЭЛ, МЭДЭЭЛЛИЙН АЛБАНААС МЭДЭЭЛЭВ.
2004-10-13/