Шведийн эрдэмтэн, мэс засалч Лейф Сэлфорд болон түүний нөхөд сүүлийн 15 жил гар утасны хүний эрүүл мэндэд нөлөөлөх байдлыг судалжээ. Өнгөрсөн зун тэрээр GSM стандартын гар утаснаас ялгарч буй бичил долгион хүнийг эрт хөгшрүүлдэг гэж дэлхийг донсолгосон мэдэгдэл хийн, Сайн дураараа өөрийн тархийг гар утасны долгионоор бөмбөгдүүлэх явдал хэзээ нэгэн цагт хийгдэж байсан туршилтуудаас хамгийн олон хүнийг хамарсан туршилт юм гэсэн нь бараг л суутнуудын хэлсэн алдарт ишлэлийн дайнд очоод байна. Сайтар бодоод үзвэл зөвшөөрөхгүй байх аргагүй.
Лейф Сэлфорд. Нутаг нэгт Еricsson компанийнхан нь түүний туршилтад баярлаагүй нь лавтай.
Сэлфордын туршилтыг олон эрдэмтэд давтан хийж эхэллээ. Жишээ дурдахад Америкийн засгийн газар 12 сая долларыг уг туршилтад гаргаж өгсөн бөгөөд харамсалтай нь үр дүн нь дээр дурдсанчлан таван жилийн дараа тодроно. Үр дүн нь адил байвал гар утас үнэхээр аюултай туршилт гэдэг нь ойлгомжтой болно. Гэвч гар утастай хүн бүр туршилт амжилтгүй болоосой гэж залбирч байгаа биз дээ.
Сэлфордын туршилт хэрхэн хийгдсэн бэ?
Тэд 32 хархыг багавтар торонд хийж, торонд нь гар утас байрлуулжээ. Хархуудын хэд хэдэн бүлэгт хуваасан бөгөөд бүлэг бүрийг хордуулах бичил долгионы түвшин өөр өөр бөгөөд дэлхийд өргөн хэрэглэгдэж буй долгионы түвшинг сонгож авсан аж. Тавь хоногийн дотор нийт хоёр цагийн утасны ярианы дараа микроскопоор хархнуудын тархийг шинжлэхэд тархиных нь цус дамжуулагч болон нейрон эдүүд гэмтэж, олон сая эд эс үхсэн нь тодорхой болжээ. Туршсан долгионы түвшин өндөр байх тусам гэмтлийн хэмжээ их байв.
Хархны тархи туршилтын өмнө болон хойно.
Тойргоор гэмтсэн хэсгийг тэмдэглэжээ.
Хэрвээ хүний тархинд ийм нөлөө үзүүлдэг бол хүний сэтгэх чадварт ноцтой нөлөө үзүүлдэг тодорхой бөгөөд Альцгеймерын гэгдэх сэтгэцийн өвчний гол шалтгааны нэг гар утас байх боломжтой гэнэ. АНУ-ын ерөнхийлөгч асан Рональд Рейганыг зовоож буй энэ өвчин нь хүний ой санамжийг бүрэн арчдаг бөгөөд утсаар ярина гэж харилцуураа аваад л юу хийх гэж байснаа мартдаг хэцүү өвчин юм. Сэлфордын хэлснээр, хархны тархи нь хүнийхтэй нэн төстэй бөгөөд адилхан эд, нейроноос тогтдог тул хүнд үзүүлэх нөлөө нь харханд үзүүлсэнтэй ижил байх аж. Ялангуяа энэ нь залуучуудын хувьд нэн аюултай бөгөөд Христийн насан дээрээ /Христ 33 насандаа тэнгэрт халижээ/ тэдний тархи бүрэн хайлж дуусна гэжээ.
Мэдээж энэ мэдээ гар утас үйлдвэрлэгчдэд хүндээр туссан бөгөөд тэр дундаа Motorola компани арслан барс мэт өөрийн бүтээгдэхүүнээ өмөөрч 30 жил хийсэн туршилтаар нь ямар ч сөрөг нөлөө үзүүлэхгүй нь тогтоогдсон гэж гүрийцгээж байна. Тэднийхээр гар утас нь нэг килограммд 1.6 ватт гэсэн тогтоосон нормоос илүү долгион ялгаруулдаггүй гэнэ. Гэтэл эрэлхэг цэрэг шведүүдийн туршилтандаа ашигласан долгион нь тэр тогтоосон норм гээчид хамаарах аж. Сэлфордын үзэж байгаагаар цаашид гар утасны эрүүл мэндэд нөлөөлөх байдлыг илүү гүнзгий, хөрөнгө мөнгө зарцуулж судлах шаардлагатай бөгөөд эцсийн үр дүн гартал гар утас хэрэглэгч хүн бүр аль болох бага хэрэглэх, зайлшгүй тохиолдолд чихэвч зэрэг зүйл хэрэглэх нь зүйтэй гэнэ.
Гэвч хэрэг ингээд дууссангүй. Зовлонт гар утсыг олон эрдэмтэд ноолж байгаагаас бас нэгэн хэрээн хоншоортой швед олныг цочроох мэдэгдэл энэ сарын 11-нд хийлээ. Линкёпингийн их сургуулийн физикчид гар утас хүний цусны улаан эсэд өөрчлөлт оруулдаг гэж мэдэгдэв.
Гэвч энэ нь тэдний судалгааны анхны үр дүн бөгөөд цаашид лавшруулан судлах бөгөөд Nokia, Sony Ericsson зэрэг нөхдүүд түр ч гэсэн амьсгаа авах боломжтой үлдэж байна. Гэвч эрдэмтэд дараагийн үр дүн энэхүү аюулыг улам бүр батлах нь тодорхой гэж үзэж байна. Хэрэв батлагдвал тусгай малгай, өмднөөс л салахгүй цаг ирэх биз. Хүний биед улаан эс нэн чухал үүрэгтэй. Чухам энэ эс л биеийн эцсийн цэг хүртэл хоол ундыг зөөвөрлөдөг ажилчин зөгий юм.
Тэд усан орчинд оршдог бөгөөд ус нь маш бага хэмжээний соронзон оронг үүсгэж улаан эсүүдийн хоорондын харилцан үйлчлэлийг бий болгодог байна. Хялбаршуулсан загвар дээр 850 мгц долгион нь цусны эсүүдэд үйлчлэх нөлөөг судалжээ. Долгионы нөлөөгөөр усан орчин нь нэг туйлтай соронзон оронг үүсгэж, эсүүдийн хоорондоо үйлчлэх хүч 11 дахин ихэсдэг аж. Энэ нь цусны өтгөрөлтөд хүргэх бөгөөд цусны эсүүд бүлэгнэлийг үүсгэснээр зүрх судасны систем хүчтэй өөрчлөлтөд ордог байна. Түүнчлэн цусыг аажмаар бүлэгнүүлж цус алдалтыг зогсоодог холбогч эдүүд хэвийн ажиллах чадвараа алдсанаас нэг цус алдвал тэр чигт нь бүх цусаа юүлэх аюултай гэнэ.
Шведүүд бол дэлхийд уламжлалдаа үнэнч, нягт нямбай, сэтгэл хөөрөл багатай, дэг журамтай чанараараа гайхагддаг. Олон нийтийн газар тамхи ч татдаггүй тэд эрүүл мэнддээ онцгой анхаардаг гэдэг. Ийм хүмүүсийн хэлж байгаад итгэхгүй байхын аргагүй юм.