Канад Улсын амбан захирагч,Эрхэмсэг хатагтай Адриэнн Кларксон, Монгол Улсын Ерөнхийлөгч Нацагийн Багабанди нарт хүндэт харуулын дарга илтгэл өгсний дараа цэргийн үлээвэр найрал хөгжим хоёр улсын төрийн дууллыг эгшиглүүлж, их буугаар 21 удаа ёслолын буудлага хийв.Ерөнхийлөгч Н.Багабанди цэргийн хүндэт харуулын өмнүр явж мэндчилэв.Дараа нь хоёр улсын төрийн тэргүүн Монгол, Канадын албаны хүмүүстэй гар барьж мэндчилэв.
Угтах ёслол дээр Канад Улсын Амбан захирагч Адриэнн Кларксон зочид төлөөлөчдөд хандан Канад, Монгол хоёр орон газарзүйн байршлын хувьд алс хол ч сүүлийн жилүүдэд ойртон дотносож,харилцаа, хамтын ажиллагаа өргөжин гүнзгийрч буйд сэтгэл хангалуун байгаагаа илэрхийлэв.
Ерөнхийлөгч Н.Багабанди хариу үг хэлэхдээ үзэсгэлэнт сайхан байгальтай, хөгжлийн өндөр түвшинд хүрсэн Канад Улсад Монгол Улсын төрийн тэргүүний хийж буй анхны айлчлал хоёр орны харилцаа, хамтын ажиллагааг хөгжүүлэхэд чухал түлхэц болж, шинэ хуудас нээнэ гэдэгт итгэлтэй байна гэлээ.
/Ерөнхийлөгчийн хэвлэл мэдээллийн албанаас мэдээллэв/
х х х