Зоогийн эхэнд Амбан захирагч Адриэнн Кларксон, Ерөнхийлөгч Н.Багабанди нар харилцан үг хэлэв.
Амбан захирагч хэлсэн үгэндээ энэхүү түүхт айлчлал нь дэлхийн орнуудыг улам бүр ойртуулж, нэгтгэж байгаагийн нэг илэрхийлэл гээд Улаанбаатар, Оттавагийн хоорондох зай урьд өмнө байсантай адилгүй бага болсон юм шиг санагдаж байна.Харилцан ярилцаж, хамтран уулзах боломж бий болж байгаагийн давуу талыг бид ашиглах хэрэгтэй гэдгийг онцоллоо.
Ерөнхийлөгч Н.Багабанди найрсгаар урьж, халуун дотно хүлээн авч,гүн хүндэтгэл үзүүлж байгаа Амбан захирагчид чин сэтгэлийн талархал илэрхийлж, Канадын ард түмэнд амжилт ололт, хөгжил цэцэглэлтийг хүсэв.
Канад оронд хийж буй Монгол Улсын төрийн тэргүүний анхны энэхүү айлчлал нь хоёр орны харилцаа, хамтын ажиллагааг шинэ шатанд гаргаж, Монгол, Канадын ард түмний харилцан ойлголцол, нөхөрлөлийг гүнзгийрүүлэхэд чухал хувь нэмэр болно гэдэгт итгэлтэй байна гэлээ.
Тэрбээр цааш нь уул уурхай, тээвэр холбоо, газар тариалан, мал аж ахуйн салбарт Канадын орчин үеийн технологи, туршлагыг нэвтрүүлэх, Канадын шууд хөрөнгө оруулалтыг нэмэгдүүлэх, муж, аймгуудын шууд харилцаа, хамтын ажиллагааг хөгжүүлэх сонирхолтой байгаагаа мэдэгдлээ.
Хоёр орны худалдаа эдийн засаг, соёл боловсролын салбарын харилцааг хөгжүүлэх боломж нөхцлийн талаар санал солилцсоноо дурдаад,яриа хэлэлцээ харилцан итгэлцсэн найрсаг байдалд болж өнгөрсөнд сэтгэл ханамжтай байгаагаа илэрхийлж, Монгол Улс хөгжлийнхээ гадаад орчинг бүрдүүлэх, эрх чөлөө тусгаар тогтнол, бүрэн эрхт байдлаа улс төр, дипломатын аргаар бататган бэхжүүлэхийн тулд олон тулгуурт гадаад бодлогыг тууштай хэрэгжүүлэх болно гэлээ.

х х х