Энэ өдөр Чеченьд хийж байгаа дайныг эсэргүүцэгчдийн жагсаал Москвад болов.
Жагсаалд 500 орчим хүн оролцсон гэж хэвлэлүүд мэдээллээ. Харин жагсаалыг зохион байгуулсан Хүний эрхийн төлөөх бүх Оросын хөдөлгөөн-ий тэргүүн Лев Понамарёв Жагсаалд 3000 гаруй хүн оролцож, дайныг эсэргүүцэж байгаагаа илэрхийлсэн гэж Эхо Москва радиод өгсөн яриандаа дурдлаа. ОХУ 1994-1996, 1999 оноос өдгөөг хүртэл Чеченьд дайн хийсээр байгаа ч ямар ч үр дүн алга гэж үг хэлсэн хүмүүс шүүмжилсэн байна.
Ерөнхийлөгч В.Путин Чеченийн босогчдыг алан хядагчид хэмээн нэрлээд, тэдэнтэй яриа хэлэлцээр хийх ямар ч боломжгүй гэж мэдэгдэж байгаа билээ. Ойрын хэдхэн сарын дотор Чеченийн босогчдын хийсэн террорист ажиллагааны улмаас ОХУ-ын 430 иргэн алагдаж, 150 сая ам.долларын хохирол учраад байна. Эд бүгдийн хариуцлагыг хүлээнэ гэдгээ Чеченийн хээрийн командлагч Шамиль Басаев мэдэгдээд байгаа юм.
(өнөөдөр 2004.10.25 249)