Хэргийг мөрдсөн тус дүүргийн Цагдаагийн хэлтсийн мөрдөн байцаагч, ахлах дэслэгч М.Отгонбаатар хэрэгтнийг өчигдөр баривчиллаа. Өнөөдөр сонины сурвалжлах хэсэг хэрэгтнийг баривчилж байх үед газар дээр нь очсон юм. Г.Халиун төмөр замын Улаанбаатар өртөөний замын эсрэг талын 11-р байранд айлын хажуу өрөө хөлслөн, хулгайлж авсан эд зүйлээ хураасан байлаа. Цагдаагийн ажилтнуудтай хамт очиж хохирогчтой уулзсан юм. Нэрээ нууцлахыг хүссэн тэрбээр
-Ажил ихтэй, зав муутай байдаг болохоор хүүхдээ харуулах гэж асрагч авах зарлал өгсөн юм. Энэ сарын5-ны өдөр Халиун гэдэг охин ирсэн. Түүнд итгэж асрагчаар авсан. Гэтэл энэ сарын 10-ны орой манай эгчийг ажлаа тараад очиход гурван настай охин маань нүцгэн, цонх онгорхой, цахилгаан зуух асалттай, хөргөгч, зурагт, хувцас хунар бүгд байхгүй байсан гэсэн. Охин маань байдгаараа даарчихсан, өлсөж цангачихсан ганцаараа үлдсэн байж.
Г.Халиун манай орцны жижүүрээс туслалцаа авч, эд зүйлийг маань зөөсөн байгаа юм. Тэгээд түүнд 5000 төгрөг өгсөн гэнэ лээ. Угаалгын машиныг л үлдээсэн байсан. Манай угаалгын машин усны шугамтай холбоотой учир авч чадаагүй бололтой. Гэхдээ авах гэж хөдөлгөсөн байсан. Хамаг юмаа ингээд алдчихдаг юм байж гэж бодож байсан чинь ашгүй баривчиллаа.
-Та бичиг баримтыг нь үзэж судлаагүй юмуу. Огт танихгүй хүн үү?
-Огт танихгүй. Хэрэг гарсны дараа цагдаагийнханд хэлэх гэтэл надад түүний ямар ч бичиг баримт байгаагүй. Зөвхөн нэрийг нь л мэдэж байсан. Хаягаа өгсөн байсан ч тэр нь худлаа байна лээ хэмээн ярив.
Ахлах дэслэгч М.Отгонбаатар Бидэнд ямар ч мэдээлэл байгаагүй ч энэ айлын утасны жагсаалтыг гаргуулж үзээд хэрэгтнийг эрэн сурвалжилж эхэлсэн. Г.Халиун урьд нь Сонгинохайрхан дүүргийн шүүхээс залилангийн хэргээр тэнсэн харгалзах ял авч байсан юм билээ. Энэ айлаас нийт 22 сая төгрөгийн эд зүйл хулгай хийсэн байна. Pentium-IҮ компьютерийг ломбарданд тавьсан гэсэн. Бид одоо очиж компьютерийг хурааж авна гэв. Дараа нь Г.Халиунаас хэдэн асуултад хариулт авсан юм.
-Анх энэ айлд очихдоо хулгай хийх зорилготой байсан уу?
-Үгүй. Ажил хийе л гэж бодож очсон. Гэнэт л хулгай хийх санаа төрсөн юм.
-Урьд нь чи үйлдсэн хэрэгтээ ял сонсож байсан юм байна шүү дээ. Тэр үед дахин гэмт хэрэг хийж болохгүйг ойлгоогүй юмуу?
-Гэмт хэрэг дахин хийж болохгүйг мэдэж байсан. Гэвч…
-Энэ их зүйлийг чи ганцаараа даахгүй нь мэдээж. Орцны жижүүрт юу гэж хэлээд туслалцаа авсан юм бэ?
-Манайх нүүж байгаа юм. Туслаад өгөөч. 5000 төгрөг өгье гэсэн. Тэгээд FM радиогоор ачаа ачна гэсэн зарлал сонсоод дуудаж туслуулсан. Мөн зарын дагуу энэ айлын хажуу өрөөг хөлслөхөөр утсаар тохирч, ачаалаад шууд ирсэн.
-Жолоочид ямар хөлс төлсөн бэ. Тийм жаахан охиныг цонхыг нь онгойлгож нүцгэн орхиод, цахилгаан зуухыг нь асаагаад гарсан гэсэн. Гал гарсан бол ямар аюул болохыг чи мэдэж байсан уу?
-Тэр айлаас авч гарсан 50 ам.доллараа банкинд төгрөг болгон солиулаад жолоочид 20 мянган төгрөг өгсөн. Зуухыг би асаагаагүй.
-Чи хаана, хэнтэй амьдардаг вэ. Сургуульд сурдаг уу?
-Хуучнаар Ханын материалын ойролцоо ээжийнхээ хамт амьдардаг. Нийслэлийн 2-р арван жилийн дунд сургуульд сурч байгаад өнгөрсөн жил 10-р ангиасаа гарчихсан гэлээ.
Хохирогч бүсгүй Хулгайн эд зүйлсээ машинд ачсанаа дараа гэрийн түлхүүрийг орцны жижүүрт орхисон байгаа юм. Гэтэл жижүүр, жолооч хоёр хүүхдийг ганцааранг нь орхиж байгааг харсан, мэдсэн мөртлөө ямар нэгэн арга хэмжээ аваагүйд нь гомдмоор. Бүхэл өдөржин ганцаараа байгаа хүүхдийг тэр жижүүр орж үзэж болно шүү дээ.Сая энд ирэхэд энэ охин миний хувцсыг өмсчихсөн сууж байгаа юм даа гэсэн юм.
/2004.11.13, Өнөөдөр/