Энэхүү өвчний үед альфа-интерферон эмчилгээ хийх нь хавдар үүсэхийг нэлээд хэмжээгээр багасгадаг аж.
Гепатит С илэрсэн олон хүний хувьд яах, хэрхэн амьдрах вэ гэсэн асуулт тулгардаг. Энэ нь хэдийгээр хүнд өвчин ч гарц бий билээ. Архаг гепатит С-гийн үрэвсэл маш удаан буюу 15-25 жил зөөлөн явцтай үргэлжилдэг бөгөөд энэ хугацаанд ямар нэг зовиур шаналгаа илрэхгүй ч байх нь бий. Гэсэн ч та амьдралынхаа хэв маягийг өөрчлөх шаардлагатай болно. Хамгийн эхлээд эмчийн хяналтанд ороорой. Архи болон элгэнд хортой бусад зүйлсээс эрс татгалз. Хоногт дунджаар найман цаг унтаж, биеийн болон сэтгэл санааны ачааллаас аль болох зайлсхий. Хоолны дэглэм барьж, шинэ хүнс хэрэглэн, өөх, тос, хайрсан хуурсан хоолноос холуур өнгөрсөн нь дээр. Эргэн тойрныхондоо өвчний халдвар тараахгүйн тулд аюулгүй байдлыг хангах үүрэгтэй. Таны цус болон бэлгийн булчирхайн шүүрэлд гепатит С-гийн вирус агуулагдаж байдаг бөгөөд бусдад халдах боломжтой. Санамсаргүй гар, хөлөө зүсчихвэл шархаа байнга боож, цусаа гэр ахуйн зүйл дээр үлдээхгүй байх хэрэгтэй. Аюулгүй сексийг сонгож, бэлгэвч хэрэглээрэй.

Архаг гепатит С-тэй эмэгтэй хүүхэд төрүүлж болох уу?
Хэрэв таны эмч болон элэг судлаач зөвшөөрч байвал мэдээж төрүүлж болно. Харин эхийн цусанд вирусийн нягтрал өндөр байгаа бол ургийг халдварлуулж мэднэ.Тиймээс ердийн эхчүүдтэй адил төрөхөөс аль болох татгалзаж, кесерова мэс заслыг сонгох нь зөв.Ердийн төрөлтийн явцад хүүхэд болон эхийн арьс салст гэмтэх магадлалтай бөгөөд ингэснээр нярай халдвар авч болно. Хэрэв та өвчнөөсөө болоод сэтгэлээр унаад байвал сэтгэл зүйчид хандаарай. Эцэст нь хэлэхэд таны сайхан сэтгэл, зориг тэвчээр ойр дотныхны чинь дэмжлэг амьдралыг чинь дүүрэн болгож, саад бэрхшээлийг даван туулна гэдэгтээ итгээрэй