Экспортын өөр шинэ бүтээгдэхүүн эрэлхийлэх хэрэгтэй.
УИХ-ын гишүүн Б. Батбаяр
-Манай улсын эдийн засаг 10,6 хувиар өссөнийг олон улсын санхүүгийн байгууллагууд ч хүлээн зөвшөөрч байгаа юм билээ. Энэ бол асар хурдацтай өсөлт. Цаашид хэр тогтвортой байх вэ гэдэг нь гол асуудал. Дотоодын нийт бүтээгдэхүүн экспортын өсөлтөөс ихээхэн хамаарсан байна. Эдийн засгийн бодит өсөлтийг тогтвортой байлгая гэвэл экспортын өөр шинэ бүтээгдэхүүн эрэлхийлэх хэрэгтэй. Тухайлбал, малын гаралтай түүхий эд боловсруулах. Гадаадын хөрөнгө оруулалтыг энэ салбарт чиглүүлэх нь зүйтэй. Уул, уурхайн болон нүүрсний нөөцийг ашиглах, алт, зэсээр бүтээгдэхүүн боловсруулж, гадаадад гаргавал үүнээс ч илүү өсөх боломжтой юм. Өөрөөр хэлбэл, их өртөг шингээсэн бүтээгдэхүүн боловсруулах боломж бий.

Далд эдийн засгийг тооцвол үүнээс ч өндөр гарах байсан байх.
УИХ-ын гишүүн Г. Занданшатар
-2004 оны эдийн засгийн бодит өсөлт нь зах зээлийн эдийн засгийн төлөвшил, тогтвортой хөгжлийн үр дүн юм. Үүнд нөлөөлсөн гол хүчин зүйл нь 9,3 сая төл бойжуулж, малын тоо 28 саяд хүрсэн явдал. Алт олборлолт 19,4 тн болж өмнөх оноосоо 74 хувиар өссөн байна. Канадын хөрөнгө оруулалттай Бороо гоулд гэхэд л 7,8 тн алт олборлосон. Гадаад худалдааны алдагдал 26 сая ам .доллараар буурч, төсвийн алдагдал 0,9 хувьд хүрсэн нь дэлхийн дунджаас ч бага байна. Азийн эдийн засгийн өсөлт гэхэд 7,4-7,8 хувьтай байгаа. Манай улс уул, уурхайн үйлдвэрлэлийг шүтэж бус бичил бизнес, жижиг,дунд үйлдвэрлэлийг хөгжүүлэх замаар ажлын байр бий болговол эдийн засгийн үр өгөөж ард түмэнд бодитой нөлөөлнө. Эдийн засгийн өндөр өсөлтийн зэрэгцээ нефтийн үнэ өссөн нь инфляцыг 11 хувьд хүргэсэн. Энэ бол эдийн засгийн хувьд эмзэг асуудал. Төсөвт бий болсон нааштай хуримтлалыг үндэсний үйлдвэрлэлийг дэмжих, ядуурлыг бууруулахад чиглүүлбэл эдийн засгийн өсөлтийн бодит чанарыг хангах болно. Түүнчлэн албан бус сектор буюу далд эдийн засгийг тооцвол 10,6 хувиас ч илүү өссөн байх. Олон улсын байгууллагууд манай улсын далд эдийн засгийг 30 хувьд гэж тооцдог. Жижиг, дунд үйлдвэрлэлийг хөгжүүлэхэд мал аж ахуйн гаралтай түүхий эдийг дотооддоо боловсруулах нь чухал.

/2005.02.5 Зууны мэдээ /