Газпром-ын удирдлага солигдсон боловч энэ уламжлал өөрчлөгдсөнгүй. Харин сүүлийн үед энэ тухай мэдээллийг нууцлах болсон гэнэ. Forbes сэтгүүлд бичсэнээр өнгөрсөн нэгдүгээр сард Газпром-ын санхүүгийн төв гэгдэх Газпромбанк-ны дэд Ерөнхийлөгчөөр ОХУ-ын БХЯ-ны сайд Сергей Ивановын 24 настай хүүг томилсон байна. Москвагийн олон улсын харилцааны дээд сур-гуулийгн төгссөн тэрээр Газпром-ын олон улсын төслийн ахлах шинжээч, ГазпрОмбанк-ны удирдах зөвлөлийн даргын туслахаар ажиллаж байжээ. Сайдын хүүг Газпромбанк-ны дэд Ерөнхийлөгчөөр томилсон явдал нь Оросын удирдлагад маш чухал юм. Ингэснээр улсын хөрөнгө хаашаа орж байгааг хянах боломжтой болно. Энэ шийдвэр нь стратеги болон улс төрийн асуудалтай холбоогүй хэдий ч өнөө үеийн хэвийн үзэгдэл юм. Дашрамд дурдахад Оросын хариуцлагатай алба хашдаг хүмүүсийн хүүхдүүд ямар ажил эрхэлдгийг сонирхуулъя.

ОХУ-ын Ерөнхий сайд Михаил Фрадковын хүү, 27 настай Петр Михайлович Фрадков өнгөрсөн жил Алс Дорнодын усан онгоц үйлд-вэрлэдэг компанийн ерөнхий захирлын орлогчоор томилогдсон билээ. Энэ нь Орост томоороо гуравт ордог хувийн компани юм. М.Фрадковыг Ерөнхий сайдад нэр дэвшүүлж байхад отгон хүүгээ Суворовын цэргийн сургуульд сургаж байгаа гэхэд Ерөнхийлөгч В.Путин ихэд гайхсан гэдэг. Ерөнхийлөгч Төрсөн хүүгээ аятайхан газрыг бараадуулалгүй өөр хот руу Суворовын сургуульд суралцуулахаар явуулсан гэхэд надад сайхан сэтгэгдэл төрсөн гэдгээ би нуухгүй хэмээн хэлж байсан.

Өдгөө Оросын Санкт-Петербург хотын дарга Валентина Матвиенког Холбооны баруун хойд хязгаар дахь Ерөнхийлөгчийн бүрэн эрхт төлөөлөгчөөр ажиллаж байхад хүү Сергей нь Санкт-Петербург банкны орлогч захирлаар томилогдсон байна. Ээж нь Санкт-Петербург хотын дарга болоход хүүг нь Внешторгбанк-ны дэд Ерөнхийлөгчөөр томилжээ.

Самарск мужийн захирагч Констатин Титовын хүү, 30 настай Алексей Титов нь орон нутгийн Солидарность банкны захирлуудын зөвлөлийн даргаар ажилладаг. Тэрээр Оросын тэргүүн баячуудын жагсаалтын 306 дугаарт бичигдсэн, 1,7 тэрбум рубльтэй тэнцэх хөрөнгөтэй.
Хабаровск хязгаарын захирагч Виктор Ишаевын хүү Дмитрий Ишаев Роснефть нефтийн компанид зөвлөхөөр ажилладаг.

Башкирийн Ерөнхийлөгчийн хүү Урал Рахимов Башкирийн түлш эрчим хүчний салбарын шилдэг менежерийн нэг. Энэ салбарт үйл ажиллагаа явуулдаг Уфимск, Новоуфимск, Уфанефтехим зэрэг компаниудыг Газпром-д нэптэсний дараа Газпромпереработка компанийн захирал болсон.

(өдрийн сонин 2005-03-04 058)