Ерөнхийлөгчийн сонгуу-лийн тов тодорч, нэр дэвшигчдийн асуудлаар улс орон амьсгалж буй үед Бүгд найрамдах нам ээлжит бус бага хурлаа хийлээ. ИЗБНН-ын Үндэсний хорооны хурлаас тус сонгуульд өрсөлдөх нэр дэвшигч төрөөгүйг ч хэлэх үү, хаалттай мэт боловч хамгийн нээлттэй энэ сэдэв олны анхаарлыг улам бүр татаж буй юм. Чухам яг энэ үед БНН Ерөнхийлөгчийн сонгуулийн анхны нэр дэвшигчээр Базарсадын Жаргалсайханыг зарлалаа.

Шинжлэх ухаан, мэдээлэл технологийн үндэсний паркт өчигдөр үд дунд эхэлсэн БНН-ын ээлжит бус бага хуралд нийт 350 орчим гишүүн, дэмжигчид оролцсон бөгөөд Монгол Улсын Төрийн дууллаар үйл ажиллагаагаа нээлттэй эхэлсэн. Бага хурлын 68 гишүүний 54 нь ирж, 79.4 хувийн ирцтэйгээр эхэлсэн хурлыг нээж БНН-ын дарга Б.Жаргалсайхан үг хэлсэн юм. Тэрбээр цахилгаан, дулааны үнэ 30 гаруй хувь, нефтийн үнэ 40 гаруй хувиар өсч, эмзэг бүлгийнхэн нийт хүн амын 70 хувийг эзлэн, ажилгүйдэл нүүрлээдбайгаа энэ хэцүү үед БНН ард түмнийхээ төлөө ажиллаж, 1990 онд нам байгуулахдаа дэвшүүлсэн аж үйлдвэрийн салбарыг эрчимтэй хөгжүүлэх зорилгодоо хойшид ч үнэнч байхаа илэрхийлэв.

Мөн Б.Жаргалсайхан Ерөнхийлөгчийн эрх, үүргийн талаар хуралд оролцогчдод тодорхой ойлголт өгөхөө мартсангүй. Энэ өдрийн хурлаар Ерөнхийлөгчийн сонгуульд нэр дэвшигчийг олонхийн саналаар тодруулах, намын бага хурлын бүх эрхийг Улс төрийн зөвлөлд шилжүүлэх зэрэг асуудлыг хэлэлцсэн. Хурлаас БНН-ын дарга Б.Жаргалсайхан 100 хувийн саналаар намаасаа Ерөнхийлөгчийн сонгуульд өрсөлдөх эрхтэй болж, түүний дөрөөг чангалан Сэлэнгэ, Орхон аймгаас ирсэн гишүүд, эмэгтэйчүүд болон ахмадын төлөөлөл үг хэлж амжилт хүссэн. Энэ үсэр БНН-ын ерөнхий нарийн бичгийн даргаар Б.Нямсүрэнг томилж, Б.Жаргалсайханы сонгуулийн кампанит ажлыг удирдах эрх олгов.

Ерөнхийлөгчийн сонгуульд нэр дэвшигч Б.Жаргалсайханы Засгийн эрх барьж байгаа намууд улс орны бэрхшээлтэй асуудлыг шийдэж чадахгүй нь тодорхой боллоо гэж өнөөгийн улс төрийн байдлын талаар дүгнэн өгүүлсэн үгээр өндөрлөсөн БНН-ын ээлжит бус бага хурал Халуун элгэн нутаг дуугаар хаалтаа хийлээ.

Ийнхүү Ерөнхийлөгчийн сонгуулийн анхны нэр дэвшигч тодорч, их сунгааны салхийг хагалав.
Б.Жаргалсайхантай аль намын хэн өрсөлдөхийг сарын сүүлчийн өдрүүдэд давхцан болж буй МАХН, АН-ын удирдах байгууллагын хурлуудаас олонд зарлана.

Р.ЭМҮЖИН
(өнөөдөр 2005-03-29 075)