Энэ хүүхдийн ээж, төрөл төрөгсдийг цагдаагийнхан эрэн сурвалжилж олсон байна. Уг хүүхдийн талаар БГД-ийн цагдаагийн хэлтсийн хүүхдийн ахлах байцаагч, ахмад М.Одончимэгтэй ярилцлаа.

-Хүүхэд олсон талаар тодруулахгүй юу?
-47 дугаар байрны хоёр айлын үүдний ойролцоо, дотуураа дан цагаан даавуу, гадуур нь нимгэн бүтээлгэнд ороосон нярай хүүхэд тавьчихаад ээж нь алга болсон байсан. Дутуу төрсөн, тархины усжилттай, толгой нь их томорсон нярай амь голтой л байсан. Бид яаран Эх нялхсын эрдэм шинжилгээний төвийн хүлээн авахад аваачсан. Хүлээж аваагүй. Клиник сувилалд аваач гэсэн. Бас хүлээж аваагүй. Ингэж яваад улам ч хүндрүүлчихсэн байх.
-Тэгээд хаана аваачив?
-ЭНЭШТ-ийн Дутуу нярайн тасагт шилжүүлж өгөөд одоо тэнд эмчилгээнд байна. Хүүхэд ердөө л нэг кг 800 грамм жинтэй юм шүү дээ.
-Аав, ээжийг нь олсон уу?
-Ээж нь Бямбатүвшин гэж ажил, сургуульгүй 20 орчим насны эмэгтэй. Эмээ ээж нь Ганцэцэг гэж хүн бий гэсэн.
-Яагаад хүүхдээ хаях болсон юм бол?
-Өлгийнийх нь завсар захиа байсан. Эрэмдэг зэрэмдэг хүүхэд төрүүлчихлээ. Хүн болгон авч чадахгүй. Амьдрал ядуу. Аваад гэртээ очвол ах маань уурлаж зодно. Иймээс сайн санаат хүмүүс минь хүн хийж аваач гэсэн байсан. Энэ эмэгтэй хүүхдээ Эх нялхсын эрдэм шинжилгээний төвд дутуу төрүүлсэн юм билээ. Их эмч Сувд эмчилж байсан. Хүүхдийг нь найм хонуулаад дутуу нярайн тасагт шилжүүлэн эмчилж байтал Бямбатүвшин Би хүүхдээ гэрээрээ асармаар байна гэж аваад гэртээ харих замдаа орцонд орхичихсон юм билээ.
-Тийм өвчтэй, ядмаг хүүхдийг эхийнх нь хүссэнээр гаргачихдаг юм байх даа?
-Итгээд л дутуу хоногтой гаргачихсан юм шиг билээ.
-Дутуу төрсөн, тэгээд тархины усжилттай хүүхэд амьдардаг юм болов уу?
-Эмч нар бол их л хүнд, хүн болсон ч хэвийн бус өсөлттэй хүн болж магадгүй гэж байгаа.

Г. Жамьян
2005.03.29, Монголын мэдээ