Тэд Ядуурлын эсрэг хамтдаа сангийнхаа нээлтийг өчигдөр хийсэн юм. Сонирхолтой нь уг сангийнхаа хүндэт тэргүунээр Ерөнхий сайдыг сонгосон байна. Ядуурлын эсрэг тэмцлийн тэргүүн фронтод өнөөг хүртэл олон улсын донор байгууллагууд хишиг түгээж ирсэн. Харин хувийн хэвшлийнхэн нийгмийн хөгжилд хувь нэмрээ оруулах салхийг хагалсан Петровис компанийн Ядуурлын эсрэг хамтдаа сангийн гүйцэтгэх захирал Ц.Ариунаа Цаашдаа бидний тэмцэлд Монголын томоохон компаниуд нэгдэнэ гэдэгт итгэлтэй байна гэлээ. Ядуурлын эсрэг хамтдаа сангийн анхны тэтгэлгийг одоогоор гурван хүн хүртээд байгаа юм. Анхны гурав Ерөнхий сайдаас тэтгэлэг гардан авсан.

НАМ, ЗАСАГТАА БАЯРЛАЛАА БИШ ЭЭ…
Дундговийн Сайхан-Овоо сумын Ж.Бямбаа гуай тэтгэлэг авснаасаа хойш Нам, засагтаа баярлалаа гэсэн үгээр яриагаа эхэлдэг зуршилтай болчихжээ. Ц.Ариунаа захирал Өвөө, энэ мөнгийг чинь нам засаг, өгөөгүй шүү дээ гэж сануулж байж ингэж хэлэх нь арай татарсан гэнэ. Ж.Бямбаа Ядуурлын эсрэг хамтдаа сангаас авсан 700 мянган төгрөг дээрээ хувиасаа мөнгө нэмэрлэж, 10 тоннын багтаамжтай ногооны зоорь барихаар төлөвлөжээ. Зоорьтой болсноор манай нөхөрлөлийн иргэдийн орлого хоёр дахин нэмэгдэнэ хэмээн тэр буурьтай нь аргагүй мэдэгдэв. Долоон өрхтэй нөхөрлөлийнхний амьжиргааг дээшлүүлэх тухай ярьж байгаа болохоор арга ч үгүй биз. Говьд ногоо хадгалах зоорьгүй болохоор аравдугаар сараас эхлээд ногооны хомсдолд орчихдог. Харин зоорьтой болбол ногоогоо бүтэн жилийн турш хэрэглэнэ. Хэрэгцээнээс илүу гарснаа худалдаж, албан газруудад зоориор үйлчлэхээр боджээ. Цаашдаа юу хийхээр зорьж байна гэсэн асуултад хариулт бэлэн. Алсдаа говьд фермерийн аж ахуйн суурь тавих бодолтой гэж товхийтэл хариулсныг яана. Улаан ямаа нь нариин ноолуур өгдөг гэх. Ямаа. үхрийнхээ тоо толгойг нэмэлгүйгээр ашиг шимийг нь арвижуулж байгаа гэнэ. Хоёр га газар хүнсний ногоо болон малын тэжээл тариалсан нь яваандаа малаа эрчимжүүлэхийн эхлэл аж. 6-7 га гаэар ногооруулах ажил хийж, Онги голынхоо сав газрын хөрсний чийгийг хамгаалах ажилд хувь нэмрээ оруулна гэж ярьдаг их эд…

ТЭМЭЭН ТЭРГЭЭР ТАЛХАА ЗӨӨДӨГ
Говьсүмбэр аймгийн Д.Энхбаяр аймгийн төвийнхнөө талхаар хангадаг. Тээврийн жолооч хүн. Одоо бол талхчин болсон. Тэмээн тэргээр талхаа зөөдөг. Талх зөөдөг удаан темпийн энэ хөлөг нь аймгийн төвөөр аялахад 5-6 цаг зарцуулчихдаг. Д.Энхбаяр мөнгөөрөө гурил зуурагч машин авахаар шийджээ. Яагаад гурил зуурагч гэж түүнээс асуухад Гараараа 200 кг гурил зуураад үз л дээ гэнэ. Тээврийн жолооч байхдаа 1987 онд осолд орсон ул мөр таяг тулж явдаг ч тэрбээр Засгийн газрын ядууралтай зарласан дайны тэргүүн фронтын дайчин шүү. Залхуураад суувал зах зээлийн үед турж үхэхээс аргагүй. Оролдвол бүтэхгүй юм байх. Тахианы аж ахуй эрхлэх санаатай гэж Өвөрхангайн Төгрөг сумын Мазар баян хайрхан хоршооны Ж.Пүрэвдорж хэллээ. Говийн санаа-чилга хөтөлбөрийнхний дэмжлэгтэйгээр нисдэг сүргийн талаар номын дуу сонсоод авчээ. Торган дээл, том мөнгөн бусээр гангарсан энэ хөдөөх эр Ерөнхий сайдтай авахуулсан зургийг минь сонинд тавиарай гэж гуйсан. Хөдөөх эрчүүд Ядуурлын эсрэг хамтдаа нэвтрүүлэгт оролцож, Ерөнхий сайдтай нэг танхимд сууж, гар барьснаа ихэд бэлгэшээж байсан юм. Ж.Пүрэвдорж 800 мянган төгрөгөө услалтын систем сэргээн засварлахад зарцуулахаар төлөвлөжээ. Ингэснээр 60 өрх ногоо тарих боломжтой болж, 300 гаруй хун хамрагдах юм байна. Одоо бол тэдний хоршооныхон дөрвөн га газарт хүнсний ногоо тариалж, амьжиргаагаа залгуулдаг гэсэн.
Хөдөөгийн хэдэн өрх ийнхүү ядуу байхгүйн төлөө тэмцэж, ядууралтай тэмцэх дайны тэргүүн эгнээнд тулалдаж явна. Хөдөө, хотынхон, хувийн хэвшлийнхэн, төр засагтайгаа хүчээ нэгтгэвэл энэ дайнд ялах цаг ойрхон биз ээ.

(өдрийн сонин 2005-03-30 078)