Ийм бизнесийг дэлгэрүүлж буй гадаад иргэдийн дийлэнх нь солонгосчууд. Бүр тэдний бохир аргаар мөнгө олох нэг хэрэгсэл болчихоод байгааг хуулийн хүмуүс ч хэлнэ. Солонгосчуудын хувьд гаршаад амташаад буй эл бизнесийг секс жуулчлал гэхэд болохоор.

Нутаг нэгтнүүддээ Монголын охид царайлаг, сайхан гэж итгүүлэн хэдэн төгрөгийг нь саана. Нүцгэн бүсгүйн зургийг бас л Монголд авч болно. Эртний түүх дурсгалт газар авбал бүр үнэ хүрдэг гэнэ. Зургийг цааш нь 100-200 ам. доллараар захиалагч нартаа ядах юмгүй борлуулдаг учир секс жуулчлал ийнхүү хөгжихөд хүрээд байна. Охидын зургийг авдаг арга нь амархан. Солонгосын загварын компаниас явж байна. Загвар өмсөгч шалгаруулахаар Монголд ирсэн. Хэрэв шалгарвал Азийн загварын томоохон агентлаг гурван сарын гэрээгээр ажиллах болно гэхэд л манай охид зургаа авхуулахаасаа татгалздаггүй аж. Охидын нэг өдрийн ажлын хэле 50 ам. доллар. Нэг ширхэг зургийг доод тал нь 100 ам. доллараар борлуулдаг тухайгаа охидын зургаар бизнес хийдэг солонгос иргэд хуулийнханд ярьжээ. Ийм учраас Зүүн Азийн орнуудад дэлгэрсэн секс жуулчлал-ын хиншүү манай улсад үнэртэж эхэлсний дохио энэ. Эхэндээ энэ төрлийн бизнес эрхлэгчид олны нүднээс далд хөдөө орон нутаг, жуулчны баазад дүрс бичлэг хийдэг байсан бол сүүлдээ их, дээд сургуулийн анги, танхимд айж эмээх зүйлгүй охидыг нүцгэлдэг болов. Үүнийг хамгийн сүүлийн үеийн нэг жишээгээр тайлбарлаж болох юм. Энэ сарын эхээр УБИС-ийн хичээлийн II байранд Монголд зорчих түр визтэй ирсэн дөрвөн солонгос залуу, оюутан охидын зургийг авч, нүцэглэж байгаад тус сургуулийн удирдлагуудад баригдсан. Үүний өмнөхөн бас л солонгосчууд цасан дээр царайлаг охидыг нүцэглэн дүрс бичлэг хийж интернэтээр цацаж байсан удаатай.

Эх оронд маань ирсэн харийн-хан охидыг нь садар самуунд уруу татан, зүй бус авирлаж байхад Хууль зүй, дотоод хэргийн сайд юу бодож суудаг юм бол. Дуртай үедээ Монголд орж ирээд, садар самууныг сурталчлаад гарч буй гадаадын иргэдэд үнэндээ хариуцлага тооцож чаддаг билүү. Их л бодлоо гэхэд албадан гаргана. Түр визтэй ирсэн хүмүүс хугацаанаасаа гурав, дөрвөн хоногийн өмнө нутаг буцахад юу нь болохгүй байхав. Хуулийнхны авч байгаа арга хэмжээ ердөө л энэ. Хэрэв тэдэнд үүрэх ял байсан бол ийн дур зоргоороо юунд авирлахав. Ингэсээр ингэсээр тэд даварч хууль журам уландаа гишгэж буй нь нууц биш. Харийнхны хэдэн халтар төгрөгт охидоо уургалуулан суугаагаа бид юу гэж ойлгох вэ. Ядаж Монголд ганц ширхэг нүдний шил оруулж ирээд бизнес хийж байгаа хүн бол өөр. Харин садар самуунд охид уруу татан суугаа хүн ялгүй өнгөрч болно гэж үү. Охид садарлаад эхлэвэл улс, үндэстэн мөхөхийн тэмдэг гэдэгсэн. Гэтэл энэ мэт секс жуучлал Монголд хөгжиж эмс охид ч эрээгээ алдлаа. Үүнийг хууль хяналтынхан нь мэдсэн мөртөө нүдээ аниад чимээгүй өнгөрөх янзтай. Секс жуулчлал-ын сүлжээг солонгосчууд атгаж байна. Тэдний зарим нь гадаадын хөрөнгө оруулалтай компани нэрээр халхавчлан дор бүрнээ янхны, газар ажиллуулж буй нь нууц биш. Кароаке нэрийн дор охидын биеийг нь үнэлүүлж, эротик кинонд тоглуулж, тэр бүү хэл охидыг хоорондоо сольж, са муурах болжээ. Иймэрхүү үйл ажиллагаа явуулж байгаа шөнийн цэнгээний газар олон бий. Тухайлбал, Нemilton,Моn-Alico,Star Wars зэрэг газрыг энд нэрлэж болно.

Тэдний нэг нь Зоос гоёл компанийн ард талд байрладаг нэгэн зочид буудал. Нэр нь Dream. Буудлын доод талд кароакетай. Тэнд 60 гаруй охин бисэ үнэлдэг бөгөөд оргил цагаар нь буудлын өрөө хүрэлцдэггүй тухай хуулийн нэгэн ажилтан ярьж байна. Эрүүгийн цагдаагийн газрын нэгэн ажилтан эл газрыг илрүүлж, мөрдөн байцаалтын явцад үйл ажиллагааг нь түр хаасан ч хэн нэгэн дарга нь лүндэн буулгаад дахиад ажиллуулчихаж. Гэвч ямар учраас үйл ажиллагааг нь сэргээсэн нь тодорхойгүй.

Сүүлийн үед гадаадынхан ч энд түр буудаллах дуртай болсон. Тус газрын зөвшөөрөл Цэцэгээ хэмээх бүсгүйн нэр дээр байдаг ч үнэн чанартаа Ли Шин Квин хэмээх солонгос хүнийнх. Эл эрхэм өөрийгөө мафийн толгойлогч, Монголд буй солонгосчуудын том ах хэмээн нэрлэдэг байсан Пак Чоль Гю-гийн дотны анд бөгөөд ИУВ компанийн дэд захирал байсан аж.

Эх оронд минь хээв нэг тухлаад, охидоор нь бизнес хийж, бохир мөнгө олох замаа засчихсан түүнийг өдий болтол албадан гаргахгүй байгаагийн учир юу юм бол. Ли Шин Квиний монгол эхнэр Цэцэгээ нь хууль хяналт, Улсын мэргэжлийн хяналтын газраас ирсэн байцаагч, булхайг нь илчилсэн хэнийг ч болов хөөрхөн аргалчихдаг шидтэй нэгэн учир эл кароаке оршин тогтнож, бизнесээ цэцэглүүлж сууна.
Эрүүгийн байцаан шийтгэх хуульд энэ төрлийн хэргийг цагдаагийнхан эрх мэдлийнхээ хүрээнд шалгах ёстойсон. Гэтэл чимээ анир алга. Монголд бугшаад буй эл бохир бизнесийг тэгээд хэн таслан зогсоох юм бол. Татварын алба уу, Улсын мэргэжлийн хяналтын газар уу. Улсын мөрдөн байцаах, Эрүүгийн цагдаагийн газраас 50-хан алхмын зайд орших эл буудал нэртэй янхны газар олны анхааралд өртөхгүй байна гэж баймааргүй. Өнөөдөр хэн нэгэнд хийсэн хэргийнх нь төлөө тохирох ялыг нь оноохгүй юм бол харийнхан улам ч олноороо ирж, дураараа аашлах болно.

Гэрт нь зочилж ирсэн нэгэн охиных нь хормой хотыг сөхөөд эрээгүй аашлаад байвал ямар ч хүн тайван хараад өнгөрүүлнэ гэж үү. Үүнтэй нэгэн адил улс , эх оронд минь ирээд садар самуун муу муухай зүйл хийж, охидыг бохир мөнгө олох хэрэгсэл болгож буй хүмүүст ядаж хавтаст хэрэг нээгээд, зохих хэмжээний ялыг нь оноох цаг нэгэнт болжээ. Харийнхан харийнхан гэж зөөллөөд байвал тэд хариуд нь юу хүссэнээ хийж, Монголын хуулийг уландаа гишгэх нь хэрээс хэтэрэх нь.

Өнөөдрийн байдлаар Улаанбаатарт гэхэд янхны газар гэж андуурмаар караоке, зочид буудал 20 гаруй байна. Дийлэнх нь гадаадын иргэдийн эзэмшлийнх байх аж. Иймэрхүү газрыг цэгцэлж, заримыг нь хааж бохир бизнест гаршсан зарим нэг гадаадын иргэдийг албадан гаргаж шийтгэхгүй бол Монгол секс жуулчлал-ын орон болох нь энүүхэнд болжээ.

Г.ЯЛГУУН
(өнөөдөр 2005-03-31 076)