МАХН-ын Удирдах зөвлөл өмнөх өдөр нь удтал хуралдаж, намын даргынхаа нэрийг Бага хуралдаа оруулж. 100 хувийн саналаар гаргахаар төлөвлөсөн тухай зарим төлөөлөгч хуучилсан юм. Ерөнхийлөгчид нэр дэвшүүлэх болоход Удирдах зөвлөлөөс Н.Энхбаярыг санал болгож, бага хурлын зарим гишүүн Ө.Энхтүвшин, Ч.Улаан, Д.Лүндээжанцан, Д.Идэвхтэн, Ц.Нямдорж зэрэг хэвлэлийн тааварт дээгүүр давхиж явсан морьд-ыг дэвшүүлжээ. Харин танхимаас нэр дэвшигчид намын нэгдлийг эрхэмд үзэж байгаагаа илэрхийлж, нэрээ татаж авцгаасан аж.
С.Баяр урьдчилан таамагласанчлан МАХН-ын дарга Н.Энхбаярыг намын бага хурлаас 100 хувийн саналаар Монгол Улсын Ерөнхийлөгчид нэр дэвшүүлэхээр боллоо хэмээн сэтгүүлчдэд ёслол төгөлдөр мэдэгдлээ.
Намын ардчилсан зарчмын дагуу таван хүн нэр дэвшсэн ч ялалт байгуулах хамгийн өндөр магадлалтай хүнээ нэр дэвшүүлэхээр бусад нь нэрээ татсан гэж тэр тайлбарласан юм. Ерөнхийлөгчид нэр дэвшигчийг тодруулахаар нууцаар санал хураасан аж. Ганцхан хүний нэр дээр санал хураасан юм чинь эцсийн хариу нь ойлгомжтой гэж сэтгүулчид ярьж байсан ч Нууцаар санал хураасан болохоор нэр дэвшигчийн рейтинг тодорно гэж найдсан бага хурлын гишүүд ч байлаа. Тус нам илээр санал хураадаг зуршилтай ч Улс төрийн намуудын шинэ хуульд нийцүүлэн Ерөнхийлөгчид нэр дэвшигчийг тодруулахдаа нууцаар санал хураажээ.
С.Баяр дарга Нууцаар санал хураах нь арай их цаг авсан гэлээ. Үр дүн нь харин урьдчилан төлөвлөсөн ёсоор гарахад нууц санал хураалт саад болоогүй бололтой.
МАХН-аас Ерөнхийлөгчид нэр дэвшигчийн мөрийн хөтөлбөрийг боловеруулж байгаа аж. Намын бага хурлын гишүүдээр уг хөтөлбөрийг хэлэлцүүлж, саналыг нь авсан гэнэ. Намын дарга Н.Энхбаяр Бага хурлыг нээж, Улс төрийн өнөөгийн нөхцөл, МАХН-ын бодлого, зорилт сэдвээр илтгэл тавьсан юм. Парламентад улс төрийн хүчнүүд зөвшилцөн ажиллах болсон нь алив нэг улс төрийн хүчний сонирхол гэхээсээ илүү 2004 оны УИХ-ын сонгуулийн үр дүнд бурэлдсэн гарцаагүй нөхцөл байдал юм гэж тэр тайлбарласан. Зөвшилцлийн үйл явцад урьдчилан тооцох боломжгүй төвөгтэй асуудал нэлээд гарлаа, цаашид ч гарах төлөвтэй гэж прогноз хийв, бас УИХ-ын 59-р тойрогт МАХН-аас нэр дэвшсэн Ж.Гүррагчаа дахин санал хураалтад ялалт байгуулж, УИХ-д тус нам 37 гишүүнтэй болсон ч дангаараа Засгийн газраа байгуулах хэмжээнд хүрч чадахгүй байгааг ч дурдаад авлаа. УИХ-ын нэр бүхий 25 гишүүн МАХН-ын бүлэгт нэгдсэнийг Н.Энхбаяр Хэдийгээр ийм алхам манай намын гишүүд, өргөн олон нийтийн дунд дасал болоогүй, сэтгэл зүйн хувьд амаргүй үйлдэл боловч намын ҮIII бага хурлын шийдвэр, улс орон, ард түмний нийтлэг эрх ашгийг иш үндэс болгон МАХН-ын бүлгийг өргөтгөхөөр шийдсэн хэмээн тайлбарлав.
Н.Энхбаярын илтгэлд улс төрийн хариуцлага, засаг төрийн тогтвортой байдал гэсэн үг олонтаа давтагдсаныг бодвол үндэсний
хэмжээний хоёр том намын нэг болох МАХН-ын үнэт зүйлд эдгээр зарчим цаашдаа ч жин дарах бололтой. Айсуй Ерөнхийлөгчийн сонгууль намын даргын илтгэлд багагүй байрь суурь эзэлжээ. Тэрбээр Ерөнхийлөгчийн сонгуульд оролцох уриагаа ч сонсгов. Хөгжлийн төлөө бодлого-Хүний төлөө зүтгэл гэсэн өгүүлбэр түүнд таалагдсан аж. Хөгжлийн төлөө бодлого гэдэг нь лав зөвшилцлийн үр дүнг нийгмийн хөгжлийн хөшүүрэг болгох санааг илэрхийлж байгаа гэнэ. Энэ үсэр мөн МАХН-ын ээлжит XXIҮ Их хурлыг товлов.
Тэр нь Ерөнхийлөгчийн сонгуулийн дараа буюу зургадугаар сарын 16-18-нд болох юм.
10.30 цагт эхэлсэн бага хурал намын даргын танилцуулснаар бол 72 хувийн ирцтэй эхэлсэн. Бага хурал 182 гишүүдээс бүрддэг аж. Намын даргын илтгэлийн дараа нэг ч гишүүн асуулт тавиагүй. Асуулт, санал байна уу, татгалзсан хүн байна уу гэх мэт уламжлалт асуултууд хариугүи өнгөрч, ярсхийтэл гар өргөх, алга ташилтын чимээтэй бага хурлын нээлтэд суусан сэтгүүлчид үүрэглэх шахав. Ардчилсан намын хурал халуухан болдогсон гэж хэн нэг нь санаашрах сонсогдсон. Харин тус намын ерөнхий нарийн бичгийн дарга танхимаас нэр дэвшүүлсэн таван хүний тухай хэлэхдээ ардчилсан зарчмаар гэдэг үгийг жигтэйхэн өргөлттэй хэлж билээ…

Б.ЯНЖМАА
(өдрийн сонин 2005-03-31 079)