Энэ тухай Кореан Эйр -ийн Монгол дахь төлөөлөгчийн газрын менежер Д.Бадрахаас тодрууллаа.

-Нислэгийн тоог юуны учир нэмсэн юм бэ?
-Монголд зочлох жуулчдын тоо өнгөрсөн онд нэмэгдсэн. Discoүer Mongolia -гийн хүрээнд энэ жилийн хувьд ч мөн адил ихсэх хандлагатай байгаа.
Монголыг зорих гадаадын жуулчид голдуу Солонгос, Хятадаар дамжин зорчдог. Тийм болохоор аялал жуулчлалын улирлад ачаалал ихэсдэг учраас нислэгийн тоог нэмэх шаардлагатай болдог. Улаанбаатар- Сөүлийн чиглэлд ирэх 6-р сараас эхлэн 287 хүний суудалтай Aerobus 330 онгоцоор долоо хоногт таван удаа нислэг үйлдэнэ. Цаашлаад, жуулчид олноор ирдэг долоо, наймдугаар саруудад өдөр бүр нислэг үйлдэхээр төлөвлөсөн байгаа.
-Тэгвэл цагийн хуваарьт өөрчлөлт гарах уу?
-Улаанбаатар -Сөүлийн чиглэлийн нислэгийн хуваарийг өөрчлөхгүй. Ер нь байнга өөрчлөөд байх нь зорчигчдод хүндрэл учруулдаг талтай. Хуучин хуваарийг хэвээр мөрдөнө. Гэхдээ манай зорчигчид эндүүрснээс болж нислэгээс хоцрох тохиолдол цөөнгүй гардаг.
Жишээлбэл, Сөүл рүү 3-р сарын 31-ний 01,20 цагт нисэх ёстой байлаа гэе. Гэтэл 01 цаг гэхээр маргаашийн өдрийн нислэг гэж эндүүрдэг. Ер нь манай нислэгийн цагийн хуваарь зорчигчдод тийм ч тохиромжтой бус л даа. Цаг уурын онцлогоос хамаарч шөнийн цагаар нислэг үйлддэг юм.
-Танай компанийг шинээр онгоц нисгэнэ гэж дуулсан ?
-Кореан Эйр авиа компани одоогоор 120 онгоцтой. Дэлхийн 33 орны 88 хот руу олон улсын нислэг үйлддэг. Ирэх оноос Aerobus 397 маркийн шинэ онгоц нэмж нисгэх төлөвлөгөөтэй байгаа.
-Аялал жуулчлалын чиглэлээр Монголыг сурталчлах тухайд ач холбогдол өгдөг үү?
-Кореан Эйр -ийн ерөнхийлөгч И.Жонхи энэ сарын эхээр Монголд зочлоод буцсан. Тэрбээр мөн Солонгосын нэр хүндтэй Ханжин группийн ерөнхийлөгч. Энэ үеэр манай орныг сурталчлах, хамтран ажиллах талаар МИАТ-ийн захирал Б.Цогоотой уулзан ярилцсан юм. Тэгээд ирэх тавдугаар сард монгол зан заншил, өв уламжлалыг сурталчилсан өдөрлөгийг БНСУ-д зохион байгуулахаар болсон. Ер нь И Жонхи Ерөнхийлөгч Монголд элэгтэй хүн. Өнгөрсөн жил Кореан Эйр -ийн ажилчид Багануурт 1000 мод суулгаж байсан шүү дээ. Энэ жил ч мөн адил.
Ирэх сарын сүүлчээр бас Кореан Эйр -ийн 80 гаруй ажилчид ирж , сайн үйлс бүтээх юм.
-Зорчигчид МИАТ-аас илүү танай компанид итгэж найддаг. Гэхдээ чухам юунд нь тэр юм бол?
-МИАТ-аас тэгтлээ олон зорчигчтой гэж болохгүй. Өнгөрсөн жил 1500 тооны зөрүүгээр их байсан. Сүүлийн үед KAL -ийн зорчигчийн урсгал нэмэгдэж байгаа. Үүний учрыг үйлчилгээ, тав тухтай холбож тайлбарлаж болно.
Үйлчилгээ гэхээр олон янз л даа. Тухайлбал, зорчигч Кореан Эйр-аар хэдий чинээ олон удаа ниснэ, түүгээр нь хөнгөлөлт үзүүлдэг урамшуулал байдаг. Ийм үйлчилгээг mileage гэдэг.
Зорчигчийн тав тух гэдгийг зөвхөн онгоцны үйлчилгээгээр дүгнэдэггүй. Сүүлийн үед транзит буюу дамжин өнгөрөх зорчигч манай компаниар үйлчлүүлэх нь ихэсч байна. Сөүлийн онгоцноос өглөө буусан ч үдэш нь АНУ руу нисэх зорчигчийнхоо түр байрлах буудлыг нь Кореан Эйр бэлтгэж, хөнгөлөлт үзүүлдэг.
-Монголын иргэний агаарын тээврийн зах зээлийн ихэнх хувийг гадаадын авиа компаниуд эзлэх хандлагатай гээд байгаа?
-Шууд тэгж ойлгож болохгүй. KAL -ийн зорчигчийн урсгал нэмэгдэж байгаа болохоос зах зээлийг эзэлж буй гэсэн үзүүлэлт биш. Манай компани МИАТ-тай хамтран ажиллах талаар ярилцаж, суудал солилцох үйлчиlгээг хийж эхлэх гэж байгаа ханжин группийн Ерөнхийлөгч И. Жонхи Монголд ирэхдээ МИАТ-ийн захиралтай уулзаж ярилцсан.. Ашигтай л байвал МИАТ шууд нислэг үйлдэх хэрэгтэй гэх зэргээр ажил хэрэгч санал, зөвлөгөө өгсөн юм. Үүнийг Б.Цогоо захирал дуртайяа хүлээн авч, урьдын ахилцаагаа сэргээе гэсэн.
-Кореан Эйр-ийн карго үйлчилгээгээр олон улсын төвшинд хоёрдугаарт ордог гэсэн?
-Олон улсын иргэний агаарын тээврийн холбоо хэмээх байгууллага гэж байдаг. Үүнээс хоёр жилийн өмнө Кореан Эйр -т өгсөн үзүүлэлт л дээ. Өнгөрсөн жилийнхийг албан ёсоор тодруулаагүй байгаа ч бараг тэргүүлж буй болов уу.
Харин зорчигч тээвэрлэлтийн үзүүлэлтээр бол 16 дугаар байрт ордог. Энэ бол чамгүй сайн үзүүлэлт.
Э.Ганчимэг
2005.03.31, Өнөөдөр