Үнэ нэмэгдэх эсэх асуудлыг өчигдөр болсон хурлаар эцэслэн шийднэ гэсэн яриа ч чих дэлсэж байлаа. Энэ тухай Улаанбаатар төмөр замын орлогч дарга В.Отгондэмбэрэлээс тодруулав.

-Ямар шалтгаанаар үнэ нэмэгдэх болов оо?
-2004 оны нэгдүгээр сард гэхэд дизелийн түлшийг Наушкийн үнээр буюу тн-ыг нь 300 ам.доллараар авдаг байсан. Одоо тн тутмыг 550 ам.доллараар авч байна. Түлшний зөвхөн нэмэгдсэн хэсгийн үнийг тооцвол сард хоёр тэрбум төгрөгийн зарлата гарч байгаа. Бас металлаар хийгдсэн, металл орсон сэлбэг хэрэгслийн үнэ өнгөрсөн оны мэн үеийнхээс 48-50 хувь өсөөд байна. Сэлбэг хэрэгсэл худалдан авч байгаа одоогийн ханшийг 2003 оныхтой харьцуулбал бүр хол зөрөө гарна. Ер нь сэлбэгийн үнэ маш их өсч байгаа.

-Мөн л шатахууны үнэ нэмэгдсэн гэдэг шалтгаанаар хот дотор автобусаар зорчиход том хүн бараг 400-500 төгрөг төлсөн тохиолдолд алдагдалгүй ажиллах боломжтой гэсэн тайлбар хэлдэг. Энэ нь зорчигчдын амьжиргаанаас хэтэрхий хол, дагаж мөрдөхөд хүндрэлтэй тул одоо болтол шийдэгдэхгүй байгаа байх. Харин танайх ингэж 15-25 хувь нэмсэнээр бүх зарлагаа нөхөж чадаж байгаа юу?
-Ер нь бид зорчих тарифийг нэмэх бус зардлаа хямдруулж, ажлын хэмжээг нэмэгдүүлэх байдлаар зарлагаа дүйцүүлэхийг зорьж байгаа. Энэ удаагийн үнийн өсөлтөд бүх зарлагаа тооцож чадаагүй. Түлш, сэлбэг хэрэгслийн үнийн өсөлт гээд нийт эргэх зарлагаа тооцож үзвэл энэ удаагийн зорчих, тээвэрлэх тарифийн өсөлт хаана нь ч хүрэхгүй л дээ. Зөвхөн алдагдлыг өртөгт нь хүргэхэд хэдэн алхам урагшлуулах хэмжээнд л байгаа. Үлдсэн зардлыг бусад тээвэрлэлтээсээ нөхөх байдлаар ажиллана.

-Тэгвэл зорчигчдын ам жиргааны нөхцөл байдлыг бас судалсан байх. Иргэд бухимдах болов уу?
-2000 оноос хойш үнэ тогтвортой байлаа. Энэ хугацаанд зөвхөн ачааны тээвэрлэлтийн хөлсийг нэр, төрлөөс нь шалтгаалж бага сага нэмж
ирсэн. Энэ өсөлт бол боломжийн үнэ. Үнийг аль болох барихыг хичээнэ. Өмнө нь 2100 төгрөгөөр зорчдог байсан газар одоо 2500 орчим төгрөгөөр зорчих жишээний жишиг гарч байгаа л даа. Гэхдээ их хэмжээгээр биш ч зорчигч, тээвэрлэлтийн үнэ дахиад ч нэмэгдэж магадгүй.

-Хэзээ?
-Хэзээ гэдгийг нарийн шийдээгүй. Энэ тухай тодорхой хэлэх боломжгүй байна.

Б.ХАЖИДМАА
(өдрийн сонин 2005-04-01 080)