Хоёр тал хамтын төлөвлөгөөндөө төмөр зам, эрчим хүч дамжуулах сүлжээ гэх мэт дэд бүтцийг хөгжүүлэх асуудлыг тусгасан байна. Айвенхоу болон Мицуи компани Монголд бизнесийн сонирхлоо ийнхүү нэгтгэж байгааг Канадын хэвлэлийн эх сурвалж Тэд Оюу толгойд хамтарч ажилласнаараа Монгол Улсын Засгийн газраас Өмнөговьд хэрэгжүүлж буй төслийг дэмжихэд чиглэгдэж байна гэж уржигдар мэдээлжээ. Тус компаниуд хамтран ажиллах төсөлдөө гарын үсэг зурсан өдөр Торонтогийн хөрөнгийн бирж дээр Айвенхоу Майнз-ын хувьцааны ханш 5 хувиар буюу 45 центээр өсч 8.80 долларт хүрчээ. Айвенхоу Майнз-ын тэргүүн Роберт Фрийдланд Мицуи-гийн дэд захирал Кацуто Моми нар бизнесийн хамтын ажиллагааныхаа талаар Монголын улс төрийн лидерүүд, парламентын гишүүдэд мэдэгдсэн талаар уг эх сурвалж мөн дурджээ. Мицуи нь Японы худалдааны тэргүүлэгч компаниудын нэг бөгөөд тус компани Айвенхоу-той хамтарч ажиллах нь Монголын эдийн засгийн өсөлтөд чухал гэж Роберт Фрийдланд хэлсэн байна. Айвенхоу Оюу толгойг 2007 он гэхэд апт, зэс олборлох дэлхийн томоохон үйлдвэр болгоно гэж үзэж байгаа аж. Мицуи компанийн талаархи зарим мэдээлэл дурдахад, Токиод төвтэй энэ компанийн 700 гаруй салбар дэлхий дээр янз бүрийн чиглэлээр үйл ажиллагаагаа явуулдаг. Тухайлбал, эрчим хүч, зарим хүнд үйлдвэрлэл, банк санхүү, худалдаа гээд маш өргөн хүрээнд ажиллаж байгаа орчин үеийн Японы эдийн засгийн өнгө төрхийг тодорхойлогчдын нэг бөгөөд жилийн орлого нь 28 тэрбум ам.доллар аж. Энэ хоёр компанийн Оюу толгойд хамтарч ажиллах гэрээнд тусгагдсан зорилтод Монголын говьд дэд бүтцийг хөгжүүлэх асуудал томоохон байр суурь эзэлж байна.

Н.ПАГМА

(өдрийн сонин 2005-04-01 080)