Ойрмогхон Гандантэгчинлэн хийдийн хашааны зүүн хаалгаар ортол нэгэн бор эр би Ерөнхийлөгчөөр сонгогдох хүнийг та нарт хэлж өгье гээд дүүхэлзэж зогсоно. Нэлээд хуучирсан хэдэн өнгийн хадаг мөрөн дээрээ тохсон харагдана. Онгод нь орсон төлөгч бололтой. Хэрэгт дурлаад хэн Ерөнхийлөгч болох нь вэ, тэгээд гэтэл,
-Үнэнээсээ асууж байна уу гээд над руу дөхөв.
-Би ч үнэнээсээ л асууж байна. Харин та үнэнийг хэлж чадах уу? Миний асуултад хариулах эсэхээ бодож байгаа бололтой, хэсэгхэн бодолхийснээ намайг хуруугаараа дохиод хашааны булан руу дагуулав. Тэр эрхмийн надад хариу болгож хэлсэн хэдэн үгийг уншигчидтай хуваалцья. Өнөө жилийн сонгуулиар Монгол Улсын Ерөнхийлөгч болох эрхэм өмнөх Ерөнийлөгч П.Очирбат, Н.Багабанди хоёроос гурван ч зүйлийг уламжлан хадгалсан байх нигууртай гэнэ.
Тэдгээрийгээ эр хүн байх, ЗХУ-д боловсрол эзэмшин байх, нэр нь хоёр үгнээс бүтсэн байх гэж төлөгч тодорхойлов. Одоо сонгуульт албаа хашиж суугаа Ерөнхийлөгчөөс шинэ эрхэм бас хэдэн зүйлээр өөр байх зурагтай бололтой.
Юуны түрүүнд хутагтуудын нутаг Завхан аймгийн уугуул энэ удаа биш байх, дээр нь сахалгүй байх, сонирхолтой нь Э үсгээр эхэлсэн нэртэй Ерөнхийлөгчтэй болно гэж айлдав.
Төрийн ажилд оролцсон байдал, гэр орны хүмүүжил нь төрийн тэргүүний суудалд багагүй нөлөөтэй нь төлгөнд буусныг тодотгов. Монгол Улсын гурав дахь Ерөнхийлөгч МАХН-ын гишүүний гэр бүлд төрж, торнисон, төрийн ажилд гар бие оролцож наад тал нь Засгийн газрыг тэргүүлж үзсэн нэр дэвшигч ялна гэж тэр шивнэлээ.
-Тэгээд тэр хүн чинь чухам хэн бэ гэж намайг шалгаахад?
-Сонгогч олны 52 хувийн саналыг авч итгэлийг хүлээсэн шинэ Ерөнхийлөгч хэмээн нохойтов.
Хэн Ерөнхийлөгчөөр сонгогдох бол гээд ам уралдан хаврын урт өдрийг өнгөрүүлж суугаа олонд хадагтай эрийн наргиантай тааврыг дамжуулсан минь энэ.

Р.Чулуун

2005.04.9, Өнөөдөр