Рок хэмээх урсгал 1950 оны эхний хагасаас тэсрэлт гаргаж, хүн төрөлхтнийг хошууруулсан. Харин монголд 1970-аад оноос ганц хоёр хамтлаг амьд хөгжим дуугарган, бас л монголчуудаа байлдан дагуулсан ажээ. Хөгжим гэдэг байнга эргэх холбоогоор зохицуулагддаг. Энэ эргэлтээс амьд хөгжим хэзээ ч гараагүй, гарах ч үгүй бололтой. Дэлхийн залуус юу сонирхож байна, манайхан яг адил. Монголчууд рокын нэг урсгал болох альтернатив хэмээх чиглэлийг ихэд сонирхож байна. Сонирходгийн учир нь их энгийн. Олны сэтгэлийг эзэмдээд байгаа тэр хөгжмийн нэг чиглэлд бие даасан олон урсгалын шинж төрх багтдаг юм. Жишээ нь Чоно хамтлагийн Залуу нас дуу. Энэ дуунд хип хопоор үглэсэн хэсэг байхад уянгын болон жинхэнэ рок хэмнэл бас сонсогддог. Ингэхээр залуус үргэлж уянгын дуу сонсмооргүй, эсвэл үглэсэн, нүсэр рокыг таалахгүй тохиолдолд альтернативийг сонгодог байна. Тиймээс энэ хөгжмийн урсгал дэлхий дахинд хүчээ авч, залуусыг байлдан дагуулсан хэвээр.
Монголд альтернатив урсгал 1996 оны дөрөвдүгээр сарын 9-ний өдөр анхны бэлт-гэлдээ орсон Нисванис хамтлагтай мөр зэрэгцэн үүсч, хөгжсөн гэж түүнийг сонсдог, судалдаг, мэдэрдэг залуус үздэг аж. Уг хамтлаг бямба гаригт үүсэн байгуулагдсан ойн баяраа тэмдэглэж, Баянзүрх Палас-т рокуудыг цуглуулсан.
Гэхдээ альтернативыг дотор нь задлан сонсох хэрэгтэй. Нисванис хэлбэрээр дуулдаг. Харин Чоно хослуулдаг бол Шөнийн галт тэрэг уянгын хэлбэрийг сонгожээ. Нэг урсгалыг олон талаас нь дуулдаг эдгээр залуус нэгдэн Тэнгэрийн ташуур нэртэй холбоог байгуулжээ. Тус холбоо шинэ залуу хамтлагийг дэмжих зорилготой юм байна. Одоогоор уран бүтээлээ туурвиж эхлээд байгаа Халуун виски, Шөнийн галт тэрэг, Огторгуй зэрэг арав гаруй хамтлаг Тэнгэрийн ташуур-т багтжээ. Харин холбоог Чоно хамтлаг ахлах бөгөөд анхны нэгдсэн тоглолтоо энэ сарын 30-нд Бөхийн өргөөнөө зохиохоор болжээ.

Б.БАДМАА
(өдрийн сонин 2005-04-11 088)