-Энэ жил тээврийн хэчнээн хэрэгсэл үзлэг, тооллогод хамрагдаж, замын санд хэдэн төгрөг төвлөрөх бол?
-Тээврийн хэрэгслийн үзлэг тооллогыг энэ сарын 11-нээс зургадугаар сарын 1-ний хооронд явуулна. Улаанбаатар хотын ерөнхий менежерээр удирдуулсан ажлын комисс болон дүүргүүдийн салбар комиссын бэлтгэл ажил бүрэн хангагдсан. Энэ жил тээврийн 80 мянган хэрэгсэл тоолуулж замын санд 2,6 тэрбум төгрөг төвлөрөхөөр тооцож багаа. Өнгөрсөн жил 68 мянган тээврийн хэрэгсэл тоолуулж 2,2 тэрбум төгрөг хуримтлуулсан.
-Зарим дүүргийн оношлогооны төв өөрчлөгдсөн гэсэн. Хаана, хаана үзлэг тооллого явагдах вэ?
-Нийслэлийн есөн дүүрэгт ЗЦГ, татварын болон Тээврийн газрын 75 ажилтан ажиллах юм. Энэ жилийн нэг онцлог нь иргэдийг чирэгдүүлэхгүй нэг цэгийн үйлчилгээ үзүүлэх явдал . Бүх дүүрэгт техникийн хяналтын төв ажиллах бөгөөд түүнд түшиглэн татвараа ч төлөх техникчээ ч оношлуулаад гарах бололцооотой. БЗД-ийнхэн Автотээврийн 22 дугаар баазад, Баянгол дүүрэг Хөсөг трейд компанид, Сонгинохайрханыхан Хилийн цэргийн 164 дүгээр ангид, Сүхбаатар дүүрэгт харьяалагддаг бол Автобус -3 ХК-д, Хан-Уулынхан Цагаан ноён ХХК-д, Чингэлтэйхэн Электрон техник, машин судлалын төвд үзлэг тооллогод орно.
-Өнгөрсөн жилүүдэд үзлэг тооллогын хугацааг сунгадаг байсан. Энэ жил яах бол?
-Иргэд, аж ахуйн нэгж байгууллага хуулийн хугацаанд татвараа төлж, тооллогод орох ёстой. Хуулийн дагуу явах учраас хугацаа сунгахгүй. Өнгөрсөн жил ч сунгаж байгаагүй. Иргэд маань нэг үеэ бодвол идэвхтэй оролцдог болсон.
-Иргэд жолооч нар юуг анхаарвал зохих вэ?
-Машины өнгө үзэмж, утаа зэргээс гадна шилжилт хөдөлгөөний тодорхойлолтыг энэ жил их анхаарна. Тиймээс үзлэг тооллогод ирэхдээ дүүрэг, хорооны Засаг даргын тодорхойлолт авч ирэх нь чухал.

Г.Цолмон

2005.04.11, Өнөөдөр