Түүний сургаалыг дагагчид Сиддхартхаг Будда хэмээн нэрлэдэг байсан бөгөөд энэ нь амьдралын үнэн мөнийг таньж мэдсэний учир гэгээрсэн, муу муухай сэтгэлээ дарсан тул тонилсон хэмээх утгыг агуулах ажээ. Тонилсон гэх нь аливаа муугаас үүрд зайлсан гэсэн утгыг илэрхийлэх ажээ.
Буддизм Яагаад энэ орчлонд зовлон зүдгүүр байдаг юм бэ? Түүнээс ангижирч болох уу? гэдэг асуултнаас эхэлдэг. Буддистууд, хүн болгон аз жаргалтай, амар амгалан амьдрахыг хүсдэг боловч ихэнх хүмүүс жинхэнэ амар амгалан гэж юу болохыг ухаараагүй байдаг гэдэгт итгэдэг. Хүмүүс эрх мэдэл, ажлын амжилт, мөнгө, нэр хүнд, алдар гавьяа, аль эсвэл олны хайрыг татаж байх нь аз жаргал мэтээр ойлгодог.
Тэд энэ бүхэн нь үүрд байх юм шигээр санадаг. Гэвч хэзээ нэгэн цагт энэ бүгдийг алдаж болно шүү дээ. Їүнээс гадна цаг тутам хөгширч байдгаас түүний бүхий л амьдралынх нь турш хурааж цуглуулсан тэр их эд хөрөнгө, нэр хүнд, алдар гавьяа нь насны эцэст үхлээс зугтахад тань тэгтлээ нэг их туслаад байхгүй болов уу. Ингэхээр юу биднийг аз жаргалтай болгож чадах вэ? Энэ асуултанд л Буддизм хариулахыг зорьдог бөгөөд бидний өдөр тутмын амьдралын туршид тохиолдож болох мөн тохиолддог янз бүрийн асуудал буюу зовлонг шийдвэрлэх арга замыг хүн төрөлхтөнд нээж өгөхийг оролддог юм.
Нэг үгээр хэлэх юм бол буддизм ертөнцийг үзэх үзэл, аж төрөх ухаан бөгөөд үүнтэй буддизмийн гүн ухаан, буддын шашинтны зан төрх салшгүй холбоотой. Буддист хүн бол Бурханыг (ухаарлыг) өөрөөсөө гадуур биш, харин өөрийн санаа бодлоос эрдэг. Ертөнцийн бүх юм харилцан уялдаатай хэмээн Бурханы сургаал үздэг. Тэгэхээр жаргаж зовох нь бидний өнөөгийн явдал үйлсээс л болно. Буян үйлдэж, зөв сэтгэж бодож явах юм бол энэ насандаа жарган, улмаар хойд насандаа ч сайн сайхныг эдлэнэ гэдэг.

/Бурхан шашины Номын хүрдэн клубтэй хамтран бэлтгэв/

/Olloo.mn/