Хүний зан чанарыг сайн мэддэг Бурхан багш аль дивангарын үеэс бодьсад болохоор шийдэж, дээд зэргийн энэрэхүй, нигүүлсэхүй сэтгэлийг үзүүлэн, хүмүүсийг айж эмээх, зовж зүдрэхээс ангижруулах болсон юм. Yүний тулд тэрбээр олон тангараг өргөж, өөрт нь ямар ч хүнд сорил тохиолдсон ч бололцоотой бүхнийг хийхээ андгайлжээ.
Хэдийгээр би Бурхан багш болох боловч, миний ертөнцөд төрж буй хүмүүс Бурханы хутгийг олж чадахгүй буюу гэгээрэхгүй бол би өөрөө гэгээрэхгүй.
Хэдийгээр би Бурхан багш болох боловч, миний гэрэл гэгээ хязгаарлагдмал, ертөнцийн өнцөг булан бүрт хүрэхгүй бол би өөрөө гэгээрэхгүй.
Хэдийгээр би Бурхан багш болох боловч, миний амьдрал хзгаарлагдмал, тодорхой он жилд багтахаар байвал би өөрөө гэгээрэхгүй.
Хэдийгээр би Бурхан багш болох боловч, ертөнцийн бүх арван зүгийн орны бурхад миний нэрийг магтан дуулж алдаршуулахгүй бол би өөрөө гэгээрэхгүй.
Хэдийгээр би Бурхан багш болох боловч, ертөнцийн бүх арван зүгийн орны хүмүүс миний сургаалд гүн гүнзгий итгэн сүсэглэж, миний ертөнцөд эснэхийг хүсч, миний нэрийг амандаа арав давтавч тэгж чадахгүй бол би өөрөө гэгээрэхгүй.
Хэдийгээр би Бурхан багш болох боловч, миний сургаалыг дагахаар шийдсэн ертөнцийн бүх арван зүгийн орны хүмүүс олон буяныг үйлдэж миний ертөнцөд эснэхийг чин сэтгэлээсээ хүсээд үхэхэд нь, би агуу их бодьсад нарын хамт тэдний өмнө тодрон гарч ирэхгүй бол би өөрөө гэгээрэхгүй.
Хэдийгээр би Бурхан багш болох боловч, ертөнцийн бүх арван зүгийн орны хүмүүс миний тухай танин мэдээд, миний ертөнцийн тухай мөрөөдөж, тэнд эснэхийг чин зүрхнээсээ хүсэн буяны үрийг таривч тэгж чадахгүй бол би өөрөө гэгээрэхгүй.
Хэдийгээр би Бурхан багш болох боловч, миний ертөнцөд төрөл олсон хэн ч гэсэн Бурхан багш болж бусад хүмүүсийг сургаж, тэднийг гэгээрэл, Их нигүүлсэхүй сэтгэлийн буян руу залж чадахгүй юм бол би өөрөө гэгээрэхгүй.
Хэдийгээр би Бурхан багш болох боловч, миний гэрэл гэгээ гийсэн ертөнцийн бүх арван зүгийн орны хүмүүс бие сэтгэлээрээ эс тайвширч, энэ ертөнцөд бусдаас илүү болохын хүслээр бадрахгүй юм бол би өөрөө гэгээрэхгүй.
Хэдийгээр би Бурхан багш болох боловч, ертөнцийн бүх арван зүгийн орны хүмүүс намайг таньж мэдээд амьдрал, үхлийн тухай нарийн үнэнийг эс ухаарч, гүн их оюун ухааныг эс олвол би өөрөө гэгээрэхгүй.
Би эдгээр тангаргийг өргөж байна. Хэрвээ миний энэ бүх хүсэл эс биелвээс би өөрөө гэгээрэхгүй. Би бээр шавхагдашгүй гэрэл гэгээний булаг болж, бүх орныг гийгүүлэн гэрэлтүүлж хүмүүсийг төөрөгдлөөс ангижруулж, хүмүүст сургаалын санг нээж, газар сайгүй буяныг үйлдэх болно.

/Бухан шашины Номын хүрдэн клубтэй хамтран бэлдэв/

/Olloo.mn/