Бид БЗД-ийн Эрүүл мэндийн нэгдлийн хүүхдийн ерөнхий мэргэжилтэн П.Эрхэмбаяртай уулзсан юм.

-Ханиад сүүлийн үед ихэсч, эмнэлгийн ор хүрэлцэхгүй байна гэх юм?
-Амьсгалын замын цочмог халдвараар өвчлөгсөд өнгөрсөн сарын дунд үеэс эрс нэмэгдсэн. Нэг хэсэг харьцангуй дулаарч хүүхэд томчуудгүй хувцсаа нимгэлснээс даарч ханиад хүрч бана. Мөн өвчнөө гэрээр дур мэдэн антибиотикээр эмчлэх гэж оролдон хугацаа алдаж, хүндрүүлчихэд ирж байна. Амьсгалын замын цочмог халдвар нь вирусээр үүсгэгддэг учраас антибиотик хэрэглэж болохгүй. Биед хор болохоос өөр үр дүн өгөхгүй.
-Энэ удаагийн ханиад ямар вирусээр үүсгэгдсэнийг тогтоосон уу?
-Тэрийг одоохондоо хэлэх боломжгүй. Уг ханиад хүүхдэд их хүнд тусч байгаа. Богино хугацаанд хүндэрч, хүнд хэлбэрийн хатгалгаа, амьсгалын замын бөглөршил болж байна.
-Танай дүүргийн хүүхдийн эмнэлгийн ачаалал ихэссэнээс ор хүрэлцэхгүй болоод байгаа гэсэн?
-Өнгөрсөн долоо хоногт ачаалал эрс ихэссэн. Нэг орон дээр хоёр хүүхэд хэвтэн эмчлүүлсэн тохиолдол ч гарсан. Харин одоо харьцангуй гайгүй болж байна. Хамгийн гол нь эцэг, эхчүүд хүүхдийнхээ ханиадыг хүндрүүлээд аргаа барагдахаараа эмнэлэгт ирэх юм. Дөнгөж ханиадны анхны шинж илрэхэд л өрхийнхөө эмчид үзүүлж, тэдний заавраар эмчлэх хэрэгтэй. Ер нь хаврын цагт хүн бүр ядарч биеийн эсэргүүцэл суларсан байдаг. Даарахгүй байж илчлэг сайтай хоол унд хэрэглэх хэрэгтэй.
-Ханиадыг гэрээр хэрхэн эмчлэх вэ?
-Бага насны хүүхдийн хамрыг цэвэрлэх, халуун аарц, сүү уулгах, витаминлаг, илчлэг хоолоор хооллох, гол нь дулаан, хувцаслах хэрэгтэй. Хамар битүүрэх, шингэн нус гоожих, ханиалгаж, халуурч эхэлбэл даруй өрхийн эмчдээ хандаарай гэлээ.

Бид дараа нь тус дүүргийн Хүүхдийн эмнэлгийн нэгдүгээр тасгаар орж эрхлэгч Алтанцэцэг эмчтэй уулзлаа.

-Сүүлийн үед томуугаар өвчлөгсөд ихэсч, бид их ачаалалтай байлаа. Өдөрт манай тасагт 10-15 хүүхэд ирж хэвтэж байсан. Энэ долоо хоногоос арай багассан. Манай нэгдүгээр тасаг 40 ортой. Өнгөрсөн сарын сүүл энэ сарын эхний 10 хоногт 45-56 хүүхэд хэвтэж эмчлүүлж байсан. Нэг орон дээр хоёр хүүхэд хэвтэж байлаа. Сургууль, цэцэрлэгийн хүүхдүүд их ирж байна. Тэд ханиадтай байж сургууль, цэцэрлэгтээ явж бусад хүүхдэд халдаах явдал гарч байна. Мөн анхны төрөгчид хүүхдээ асрах мэдлэг муугаас нярай хүүхэд ханиад хүрч хатгалгаа авчихаад ирэх нь элбэг байна. Агаарт хүүхдээ салхилуулж болохгүй. Тиймээс өрхийнхөө эмчтэй байнга холбоотой байж зөвлөгөө авч байх хэрэгтэй. Аль болох ханиадыг хүндрүүлэлгүй дур мэдэн элдэв антибиотек хэрэглэхгүй байх нь чухал байна гэсэн юм.

Б.Майцэцэг