Энэ тухай тодруулахаар БСШУЯ-ны ерөнхий боловсролын хэлтсийн дарга Г.Батболдтой уулзсан юм.

-ЕБС-ийн төгсөгчдийн шалгалтанд гарсан өөрчлөлтийн тухай мэдээлэл өгөх үү?
-ЕБС-ийн 4,8,10-аар анги төгсөгчидөөс урьд нь математик, Монгол хэлээр шалгалт авдаг байсан. Энэ жилээс эхлээд улсын шалгалт бус төгсөлтийн шалгалт авахаар болоод байна. Энэ шалгалтыг сургууль өөрөө зохион байгуулж авна. Өөрөөр хэлбэл шалгалтын сэдвийн боловсруулалт өгөх, шалгалтаа авах, үр дүн мэдээгээ гаргах гээд бүх ажлаа тухайн сургууль өөрөө хариуцна. Энэ нь тухайн сургууль сургаж байгаа бүтээгдэхүүдээ өөрөө үнэлгээ өгч, өөрөө хүлээж авах болж байгаа юм. Дөрөвдүгээр ангиас математик, монгол хэлний шалгалтыг уламжлалт бичгийн ажлаар авна. Наймдугаар ангиас тухайн сургууль нь нэгдсэн таван шалгалт авна. Монгол хэл, Уран зохиолын шалгалтыг хамтад нь математикийн шалгалтыг уламжлалт бичгийн ажлаар авна. Мөн хими, газар зүй, гадаад хэлний шалгалтыг аман хэлбэрээр авна. 10-аар ангиас зургаан шалгалт авах болсон. Монгол хэл, Уран зохиол, алгеврийн шалгалтыг уламжлалт хэлбэрээр, давхар хими, физик, нийгмийн тухай мэдлэг, гадаад хэлний шалгалтыг аман хэлбэрээр авна. Гадаад хэлний шалгалтын хувьд зөвхөн Орос юмуу англи хэлний шалгалт өгнө. Яагаад гэвэл манай дунд сургуулиудад тавдугаар ангиас нь эхлээд орос англи хэлний хичээлүүд ерөнхий эрдмийн хичээл болгоод орж байгаа. Тухайн хүүхэд Хятад, Герман хэлийг гүнзгийрүүлэн судалсан байж болно. Гэсэн ч энэ хэлээр шалгалт өгөх ёсгүй.

-Сургуулиуд өөрсдөө шалгалтаа авна гэдэг нь хэр шудрага, бодитой байх юм бол. Тэд өөртөө бол гайгүй үнэлгээ өгөхийг л бодно шүү дээ?
-Шудрага болох ёстой. Шалгалтыг сургууль багш нарт нь өгсөнгүй. Дээрээс нь шалгалаа гэдэг гомдол их л гардаг байсан. Энэ нь яам төвтэй шалгалтаас, сургууль төвтэй шалгалтын тогтолцооруу шилжиж байна. Гэхдээ үүнийг дан ганц сургуульд нь даатгаад орхиж байгаа асуудал биш. Бид араас нь хянаж шалгах механизмийг бүрдүүлнэ. Зарим сургууль багш нар нэр төрөө өргөх гэсэн зохиомол байдал үүсэхийг үгүйсгэхгүй. Сайнтай муутай, эрээнтэй бараантай юм гарах л байх. Хамгийн гол нь сургууль багш нар маань үнэн зөв, шудрага дүгнээсэй л гэж бодож байна. Улсын хэмжээнд 4, 8, 10-аар анги төгсөгчдөөс улсын нэгдсэн шалгалтыг авдаг болно. Энэ шалгалтын дүн багш нарын өөрсдийнх нь тавьсан дүн хоёр бодит байдалтай нийцэхгүй, хэтэрхий их зөрүүтэй байх юм бол хариуцлага тооцох асуудал яригдана.

-Сургууль болгон ингэж өөрсдөө шалгалтаа авдаг болсон нь ямар ач холбогдлолтой юм бэ?
-Тэртээ тэргүй найм арван жил өөрсдөө шалгаад л үнэлээд л ирсэн шүү дээ. Үүнд нэг их гайхаад байх юм байхгүй. Түүний үргэлжлэл болгоод шалгалтаа аваад дүнгээ гаргаад, адистатаа олгоод явна.

-10-аар ангийн төгсөлтийн шалгалтаар их дээд сургуульд элсэх босго оноо гаргах талаар яригдаад байна. Энэ ямар учиртай юм бол?
-Энэ тухай одоогоор журам заавар гараагүй болохоор тодорхой юм хэлэх аргагүй. Гарсан үед нь бид мэдэгдэж, тайлбарлах болно. Их дээд сургуульд ороход маш олон шат дамжлага дамждаг. Сургууль нь нэг шалгалт авдаг, дараа нь улсын нэгдсэн шалгалт авна, тэгээд их дээд сургуульд элсэх шалгалт авдаг энэ олон шат шалгалтыг багасгаж цөөхөн шаттай болгох талаар анхаарч байгаа. Улсын нэгдсэн шалгалт гэдэг маань хүүхдийнхээ мэдлэгийн шалгалтыг авахаас гадна, тэр нь их дээд сургуульд элсэх босго оноо болдог зарчимыг ярилцаж байна.

-Төгсөлтийн шалгалтууд хэдийгээр болох вэ?
-6 сарын 20-ны дотор бүх сургуулиуд төгсөлтийн шалгалтаа зохион байгуулж, дүн мэдээгээ өгөөд дууссан байх ёстой. Тэрний дараа улсын нэгдсэн шалгалтууд явагдана.

/Olloo.mn/ Ж. Алтантуяа