Тус яамнаас найман аймаг, гурван хотоор аялж, санал асуулга явуулж, хөтөлбөр хэлбэрээр цаасан дээр буулгасан гэнэ. Жижиг дунд үйлдвэр эрхлэхэд юу саад болж байна, түүнийг арилгахыг хичээсэн гэж дэд сайд ярилаа.Төрийн мэдээллийн төвд болсон хэвлэлийн хуралд таван яамны хэвлэлийн төлөөлөгч оролцож, жижиг дунд үйлдвэрийг дэмжсэн яамдынхаа ажлыг танилцуулав. ЖДҮ-ийг дэмжих хөтөлбөр хэрэгжсэнээр 200 мянган ажлын байр бий болно гэж Ц.Энхтүвшин сайд ярилаа. Гэсэн ч ийм үр дүнд хүрэхийн тулд олон ажил хийх хэрэгтэй болжээ. Хууль эрх зүйн хүрээнд гэхэд л Татварын багц хууль, Аж ахуйн үйл ажиллагааны тусгай зөвшөөрлийн хууль зэрэгт өөрчлөлт оруулахын зэрэгцээ, ЖДҮ-ийн тухай, лизингийн тухай зэрэг хуулиудыг шинээр санаачлахаар тогтжээ. Хууль дүрэмд өөрчлөлт оруулах болон ЖДҮ-ийг дэмжих хөрөнгө оруулалт хөгжлийн сан байгуулах, төрийн үйлчилгээний талаар санал гомдол хүлээж авах Шуурхай үйлчилгээний цэг-тэй болох зэрэг ажлаа 2006 он хүртэл гүйцэтгэхээр төлөвлөсөн байна. 2010 он хүртэл хэрэгжүүлэхээр төлөвлөсөн уг хөтөлбөрт бизнес инкубатор, технологи дамжуулах төвүүдийг хот суурин бүсийн төвүүдэд байгуулах, лиценз зөвшөөрлийг цахим сүлжээгээр олгох зэрэг олон ажил харагдана. Хүмуүсээ сургахад анхаарна гэдгээ дэд сайд онцлов. Зөвхөн сургалтад хамрагдсан хүмүүст жижиг зээл олгох тухай чярьж байгаа аж. Бүсийн төвүүдэд байгуулах мэргэжлийн сургалтын төвүүд болон, бизнес инкубаторт хүмүүсээ сургахаар төлөвлөсөн юм билээ.

Б.ЯНЖИН
(өдрийн сонин 2005-04-13 090)