Явцын дунд Б.Жаргалсайхан нэрээ татаж, МАХН-ын нэр дэвшигч Н.Энхбаярыг дэмжиж ажиллана гэсэн мэдээлэл улс төрийн хүрээнийхний чихийг халууцуулах болсон нь нууц биш. Өнөөдөр сонин энэ талаар БНН-ын дарга Б.Жаргалсайханаас тодруулав.

-Н.Энхбаяр, М.Энхсайхан нар сурталчилгааныхаа нээлтийг хийчихлээ. Харин та чимээгүй л байх юм?
-Өнөөдөр 11 цаг 30 минутаас Драмын театрын үүдэнд сурталчилгааныхаа нээлтийг албан ёсоор хийнэ. Нээлтээ хийчихээд дараагийн ажилдаа идэвхийлэн орохоор төлөвлөсөн.
-Таныг явцын дунд нэрээ татаж Н.Энхбаярыг дэмжинэ гэсэн мэдээлэл бий. Энэ талаар та юу хэлэх вэ?
-Намайг нэрээ татна гэж хэн гуай нь зүүдлээв. Жаргалсайханыг сонгуульд өрсөлдүүлэхгүй байх гэсэн сонирхолтой хүмүүсийн зүгээс гаргасан хоосон яриа. МАХН, АН-ынхан надад ялагдчихна гэж айсандаа ийм гүтгэлэг зохион явуулж байгаа хэрэг. БНН-ын өмнөөс хариуцлагатай мэдэгдэхэд Жаргалсайхан миний бие нэрээ татахгүй, энэ тухай бодоогүй, бодохгүй, өрсөлдсөн шиг өрсөлдөх болно. БНН тэгж гуйвж дайвдаг улстөрийн хүчин биш.
-Нууц биш бол мөрийн хөтөлбөрийн чинь гол ноён нуруу юу вэ?
-Гурван зүйлээс бүрдсэн нийгэм, эдийн засгийн асуудлыг хөндөж, үндэсний аюулгүй байдлын талаар болон хүнээ дээдэлсэн төрийн бодлогыг багтаасан мөрийн хөтөлбөрөө боловсруулж дууслаа. Өдөр бүр үүдийг чинь тогшиж байгаа ард түмний ядуу амьдрал дээр миний мөрийн хөтөлбөр үндэслэсэн гэдгийг бас хэлье.

Б.Умард
/Өнөөдөр 2005-04-13/