Харин яг хэдийд УИХ-ын дарга, МАХН-аас Ерөнхийлөгчийн сонгуульд нэр дэвшигч Н.Энхбаяр чуулган завсарлуулах захирамжид гарын үсэг зурахыг товлоогүй байгаа аж. Төрийн байгуулалтын байнгын хорооны дарга С.Батболдын ярьж буйгаар бол 2005 оны Ерөнхийлөгчийн сонгууль дуустал төрийн ордон нам гүм байж, эрхэм гишүүд томилолт өвөрлөн тойрогтоо ажиллах юм байна. Мэдээж тус тусын намаас нэр дэвшигчээ ялуулах нь тэдний гол зорилго байх юм. Чуулган завсарлахаас урьтаж УИХ-ын сонгуулийн тухай хуулийн төслийг өргөн барихаар ажлын хэсгийнхэн тун шаргуу ажиллаж байгаа гэнэ.
Одоогоор пропорциональ, можаритар, холимог гэсэн системийг сонгох тал дээр намуудын санал нэгдэж байгаа бололтой.

Э.Төр
2005.04.13, Өнөөдөр