Үүнийг уншсан эрхэм авгай танд дэлхийд зартай урлагийн тоглолт ирчихээд өөрөө тэрхүү гайхамшигт зүйлээс хоцорсон мэт сэтгэгдэл төрж магадгүй юм.
Та бүү санаа зов. МБНН-аас ерөнхийлөгчийн сонгуульд нэр дэвшсэн Б.Жаргалсайханы сонгуулийн сурталчилгааны нээлтэд оролцож түүнд амжилт хүсч баяр хүргэхээр Улаанбаатарчууд цугласан нь тэр. Сонгуулийн сурталчилгааны нээлтийн ажиллагааг сонирхсон хэн бүхэнд нэр дэвшигч Б.Жаргалсайханы сонгогч олондоо хандаж хэлсэн үг, дэвшүүлж буй зорилт нэн таалагдасан гэдгийг хэлэх нь зүйтэй болов уу. Тэрээр МАХН-аас нэр дэвшигч Н.Энхбаяр шиг тал зассан өнгө аястай зүйл нэгийг ч хэлсэнгүй. Өнөөх л шулуухан зангаараа ард түмэн минь элдвийн явган ярианд бүү автаарай. Би хэзээч Энхбаярт тахимаа өгөхгүй, гагцхүү өнөөгийн нийгэмд өгүүлэгдэж буй тэр орон зайг олж харах нь чухал гэдгийг та бүхэн дор бүрнээ болгоож суугаа биз ээ. Тийм учраас би Ерөнхийлөгчийн сонгуульд Төрд хяналт, хариуцлага, түмэн олонд ажил орлого гэсэн уриатайгаар оролцож байна хэмээж байв. Мөн энэ үеэр цугласан олныг төлөөлж оюутан Н.Пүрэвтунгалаг, орон нутгийн төлөөлөгч Н.Баяржаргал, СХД-ийн иргэн О.Нарангэрэл нар баяр хүргэж түүнд итгэл хүлээлгэж буйгаа албан ёсоор мэдэгдэж байлаа. Та бүхэнд сюрприз болгоход Б.Жаргалсайхан хөгжимд дуртай, энэ нь түүний хообий гэдэг нь үнэн юм билээ. Нэр дэвшигч маань ёслолын ажиллаагааны бэлтгэлийг биечлэн удирдаж байснаас гадна хөгжмийнхөө бүх зэмсгийг тохируулсан гээд бод доо. Драмын театрын өмнөх талбайгаас гараагаа эхэлсэн сурталчилгааны баг Б.Жаргалсайханыг дэмжигчдийн цуваатай нийлэн ёслолын ажиллагаагаа үргэлжлүүлэхээр нийслэлийн Хан-Уул дүүрэг рүү хөдөлсөн юм. Монгол Улсын Ерөнхийлөгчийн ээлжит сонгуульд БНН-аас нэр дэвшигч Б.Жаргалсайхан өнөөдөр эмнэлгийн ажилтан ажилчидтай биечлэн уулзаж, тэдний санал бодлыг сонсох аж.

Ч.Чулуунцэцэг
2005.04.14, Өдрийн сонин