-Чиний шагналуудыг үзлээ. Энэ олон шагнал өргөмжлөлийн юугаар авсан бэ? /
-Би дуу дуулдаг, шатар тоголдог, мөн яамаха, касио, төгөлдөр хуур зэрэг хөгжим тоголдог. Бас англи орос хэл үздэг. Энэ бүхнийг зааж өгсөн багш нарын буянаар энэхүү шагналуудыг авсан.
-Чи энэ их авъяасыг хэнээсээ өвлөж авсан бэ. Танай гэрээс хэн нэгэн ийм авъяастай юу?
-Манай нагац эгч Сэлэнгийн долгио чуулгын дуучин МУГЖ Л.Оюун. Манай эмээгийн талынхан ер нь урлагийн авъяастай хүмүүс.
-Хамгийн дуртай сонирхдог зүйл чинь юу вэ?
-Шатар тоглох хамгийн дуртай. Анх 2003 оноос Төр Монгол сургуульд орсоноос хойш шатар сонирхох болсон.
-Шатрын ямар ямар тэмцээнүүдэд оролцож амжилт гаргаж байсан бэ?
-2004 оны Хотын аварга шалгаруулах өсвөрийн шатарчдын тэмцээний хүрэл медаль, 2004 оны Хүүхэд хөгжлийн Ундраа төвийн шатрын төрөлд 1-р байр, 2005 оны Монгол улсын шатрын спортын дэд мастер Чүлтэмсүрэн агсны нэрэмжит Өсвөрийн шатарчдын олон хотын тэмцээнд хүрэл медаль, 2005 оны Ирээдүйн одод өсвөрийн шатарчдын тэмцээний мөнгөн медаль зэргийг хүртсэн.
-Шатар тоглож байх үед мөн хожих, хожигдох үед ямар байдаг вэ?
-Шатар тоглож байх үед аймаар байдаг шүү. Яах бол гэж бодогдоод л. Би ер нь нэг эсвэл хоёрдугаар байр эзэлчих юмсан л гэж бодож тэмцээнд ордог. Хожигдохоор сэтгэл их хэцүү болоод, өөртөө уур хүрээд уйлчихдаг.
-Даам тоголдог уу?
-Шатар тоглодог хүн даам нэг их тоглох хэрэггүй. Yйлдлээ буруу удаан бодоод байдаг сөрөг талтай гэж багш маань хэлсэн. Тийм болохоор би бараг даам тоглодоггүй.
-Чи ер өөрийгөө ямар зан ааштай гэж боддог вэ?
-Би их шартай зантай. Бусдаар бол зүгээр.
-Чи аялан тоглолтоо Хөх хотод явж хийсэн юм байна. Тэр талаараа ярихгүй юу?
-Аялан тоглолтоо Өвөр Монголын Хөх хотод хийсэн. Yнэхээр гоё болсон. Тэндэхийн хүүхдүүдийн урлагийн тоглолтыг үзсэн. Надад маш их таалагдсан. Савхтай бүжиглээд л нугараад л их авъяастай юм билээ. Тэнд бас дугуйн гүүр байдаг юм билээ, тэр нь их гоё санагдсан.
-Тэнд тэгээд найз нөхөд олонтой болсон уу?
-Өвөр Монгол хүүхдүүдтэй зөндөө л танилцсан. Хуар гээд нэг найзтай болсон шүү.
-Гадаад өөр улс руу явж үзсэн үү. Хаашаа явж үзэх юмсан гэж боддог вэ?
-Би Хөх хотоос гадна Оросын Хиагт явж үзсэн. Миний дандаа хүсдэг, мөрөөдөл бол Япон орныг үзэх. Тэнд заавал очих болно. Гэхдээ очоод хар ажил хийх биш шүү.
-Чи ер нь хэр олон найзтай вэ. Чи чөлөөт цагаараа найзуудтайгаа юу хийдэг вэ?
-Мандухай, Энхбаяр, Батхонгор, Саруул гээд зөндөө найзууд бий. Заримтай нь зөвхөн тэмцээний үеэр л уулзалддаг юм. Найзуудтайгаа хамт тоглох, зураг зурах гоё шүү. Би бас ширээний теннис тоглодог. Хөдөө эмээгийндээ очоод хөл бөмбөг тоглох дуртай.
-Чи хэзээнээс дуулж бүжиглэж эхэлсэн бэ?
-Би бүр багаасаа л дуулж бүжиглэдэг байсан. Надад Т.Ариунаа эгч таалагддаг бас Номин талст хамтлаг.
-Тоглолтон дээр тохиолдсон хөгжилтэй явдлаасаа хуваалцаач?
-Дэгдээхэй нас тайлан тоглолтоо хийж байхад болсон явдал. Би анх удаа үлээвэр найрал хөгжимтэй дуулсан юм. Тэгээд л тайзан дээр гараад л дуулах гээд байж байтал гэнэт араас бүүб гээд аймаар чанга үлээвэр найрал хөгжим дуугарахад нь цочсондоо би микрофоноо алдчихсан. Тэгээд багшдаа загнуулсан.
-Ямар хичээлд түлхүү сонирхолтой вэ. Бас багшдаа их загнуулдаг уу?
-Би шатрын хичээл, мөн монгол хэлэндээ илүү сонирхолтой. Хичээлээ ойлгохгүй багшдаа загнуулах зодуулах явдал байдаг. Гэхдээ дараа нь хичээлээ ойлгоход их гоё байдаг. Тийм болохоор гомддоггүй.
-Ер нь хичнээн удаа тоглолтоо хийсэн бэ?
-Анх 2002 онд Дэгдээхэй нас-1 бие даасан тайлан тоглолт, 2003 онд Дэгдээхэй нас-2 тоглолтоо Сэлэнгэ аймгийн Алтанбулаг суманд, 2003 онд Цоглог нас тоглолт Хэнтий аймгийн Бор-Өндөр суманд, 2004 онд Өвөр Монголын Хөх хотод аялан тоглолт тус тус хийсэн.
-Ийм их авьяастай байж чи урлагийн хүн болохгүй юм уу?
-Yгүй. Би шатрын их мастер болно.
-Яагаад?
-Урлагийн хүмүүс их аальгүй маягтай байдаг ш дээ. Би аальгүй занд дургүй.
-Чи үеийнхээ найзуудад хандаж юу гэж хэлмээр байна?
-Ээж аав, багш нарынхаа үгэнд ороод хичээлээ сайн хийх хэрэгтэй шүү. Бас шатар их тоглож байгаарай гэж хэлье. Би уг нь их онгироо, томоотой сууж чаддаггүй байнга ийш тийшээ гүйж байдаг сахилагагүй хүүхэд байсан юм. Гэтэл шатар тоглодог болсноос хойш юманд бодлоготой ханддаг жаахан томоотой болоод байгаа.
-За ингээд миний асуугаагүй эсвэл чиний яримаар юм юу байна?
-Би ээж болон багш нартаа баярлаж явдаг шүү гэж хэлмээр байна.
-Чамд улам их амжилт хүсье. Баярлалаа.

Блиц анкет
Нэр А.Энхтуул
Сургууль Гадаад хэл, математикийн гүнзгийрүүлсэн сургалттай Төр Монгол дунд сургуулийн 4-р анги.
Нас 11
Шагнал өргөмжлөл 2001 онд Бяцхан тод авъяастан тусгай байр, МХО-ны Эрдэм алт мөнгө хүрэл медаль, Монголын хүүхдийн үндэсний төвийн Авъяас мөнгөн медаль, Олон улсын Найрамдал төвийн мөнгөн медаль, 2002 оны Эрудит СӨБТ-ийн Шилдэг авъяаслаг сурагч өргөмжлөл, 2002 оны Алтан цом дууны уралдааны мөнгөн медаль, 2003 оны Алтан цом дууны уралдааны алтан медаль, 2003 онд НХЗХГ-ын Шилдэг сурагч цомын эзэн, 2003 оны Нийслэлийн шилдэг сурагч цомын эзэн, 2003 оны Боловсрол хүмүүжлийн Эрэл төвийн алтан медаль, 2004 оны НХЗХГ-ын хошой алтан медаль гэх мэт.

Болод.М /olloo.mn/