Засгийн газрын мэдээлэл
ЕВРОПЫН ХОЛБОО, МОНГОЛ УЛСТАЙ ИДЭВХТЭЙ ХАМТАРЧ АЖИЛЛАНА
Ерөнхий сайд итгэмжлэх жуух бичгээ өргөн барьсантай нь холбогдуулан элчин сайдад баяр хүргээд, Монгол улсын гадаад бодлогын тэргүүлэх чиглэлийн нэг нь Европын холбоотой тогтоосон харилцааг бүх талаар идэвхтэй хөгжүүлэх явдал гэдгийг онцлон дурьдаж, манай улсын эдийн засгийн шинэтгэлийг дэмжиж байдагт талархал илэрхийлэв.
Уулзалтын үеэр Монгол улсаас нийлүүлж буй экспортын бараа бүтээгдэхүүнд хөнгөлөлт үзүүлэх болон зах зээлийн бус эдийн засагтай орны жагсаалтаас манай улсыг хасуулах болон хамтын ажиллагааг бүх талаар идэвхжүүлэх боломжийн талаар хөндөн ярилцлаа.
Ноён элчин сайд Европын холбоо Монгол улсын эдийн засгийн шинэтгэлийг эрчимжүүлэхэд чиглэгдсэн хөтөлбөрүүдийг эрчимтэй хэрэгжүүлж, хамтын ажиллагаа, харилцааг идэвхтэй хөгжүүлэх талаар анхаарал хандуулж ажиллахаа илэрхийлэв.
БҮГД НАЙРАМДАХ ФИНЛЯНД УЛСЫН ЭЛЧИН САЙДЫГ ХҮЛЭЭН АВЧ УУЛЗАВ
Монгол Улсын Ерөнхий сайд Ц.Элбэгдорж Бүгд Найрамдах Финлянд Улсаас манай улсад суух Онц бөгөөд Бүрэн эрхт хатагтай Маръя Лийза Кильюненийг итгэмжлэх жуух бичгээ барьсантай нь холбогдуулан хүлээн авч уулзлаа.
Ерөнхий сайд Ц.Элбэгдорж Элчин сайдаар томилогдсонд нь түүнд баяр хүргэж, хоёр улсын харилцааг цаашид улам өргөжүүлэн хөгжүүлэхэд идэвх зүтгэл гарган ажиллаж, үр дүнд хүрнэ гэж найдаж буйгаа илэрхийлэв. Цааш нь Ерөнхий сайд Монгол Улсын нийгэм, эдийн засаг, улстөрийн байдлын талаар товч танилцуулаад, Европын холбооны орнууд, тэр дундаа Финлянд Улстай худалдаа, эдийн засаг, соёлын салбарт идэвхтэй хамтран ажиллахын сацуу, хөрөнгө оруулалтыг хөхиүлэн дэмжих, харилцан хамгаалах, давхар татварын тухай хэлэлцээрийг байгуулахад Финляндын тал анхаарч ажиллана гэдэгт итгэлтэй байгаагаа илэрхийлэв.
Мөн түүнчлэн Финлянд улс дэлхийд хамгийн бага авилгатай орны тоонд ордог, цахим засаглал ч мөн хөгжсөн үлгэр жишээ орны нэг гэдгийг Ерөнхий сайд тэмдэглээд, Монгол Улсад авилгыг бууруулах болон цахим засаглалыг хөгжүүлэхэд туршлагаасаа харамгүй хуваалцаж, мэргэжилтэн солилцох хүсэлтэй байгаагаа Ерөнхий сайд хэллээ.
Элчин сайд хатагтай М.Л.Кильюнен хоёр талын харилцааны өнөөгийн түвшинд сэтгэл өндөр байгаагаа илэрхийлээд, харилцаа, хамтын ажиллагааг өргөжүүлэх, хөгжүүлэх олон санал, санаачлага төлөвлөж байгаагаа тэмдэглэн Монгол Улсын Засгийн газар бүх талаар дэмжинэ гэдэгт найдаж буйгаа илэрхийллээ.
Засгийн газрын Хэвлэл, мэдээллийн алба
2005.04.14
