Өдөр өдрийн минь инээд нулимс, өрөөлийг бүү бүдрээсэй хэмээхдээ хэлж буй миний бүдэрсэн чулуу, олзыг олуулуу гэхдээ өгье гэсэн сэтгэл минь энэ билээ.
, , ,
Уран зохиол бол нулимс инээд гэсэн хоёр туйл өөд тэмүүлсэн сэтгэлийн давалгаа.
, , ,
Өдөр бүхэн шинэ юм эхэлдэг хүн тал хомоол уугиж дуусахыг эс үзнэ.
, , ,
Өөрийгөө магтана гэгч толинд туссан дүрсээ үнсэхтэй ялгаа юун.
, , ,
Шүлэг уншаагүй өдөр сэтгэл дарах хумхийн тоос зузаан.
, , ,
Өчигдөрхөн сүүдрээсээ бусгаж явсан адуу өнөөдөр зэлүүд талын дунд сүүдэртэйгээ ханьсан бараантана.
, , ,
Амар сайхан жаргаж төгссөн үлгэрийн үргэлжлэл бол амьдрал.
, , ,
Гуниг гутрал гэгч гал ус мэт зөөлнөөр мөлхөн ирж итгэл зоргийн ирмэгийг хүлхэнэ.
, , ,
Тэр ойд энэ жилийн сүхний иш, хойтон жил гөлөглөх нахиа аль алин нь бий.
, , ,
Ном унших гэж бусдын багажаар өөрийнхөө оюун ухааны худгийг ухахыг хэлнэ.
, , ,
Бүсгүй хүн шанхныхаа үсийг өөд нь татахаа байхаар урд хормойгоо гишгэж эхэлнэ.
, , ,
Байхгүй нь байж, байгаа нь олширсноос зовлон үүдэх нь бас бий.
, , ,
Явган явах газар далавч саад болно.
, , ,
Хожуу гэрэлсэн эм, өнгөрснийх нь өргөсөөр эр нөхрөө хатгаж байдаг.
, , ,
Алдааг мэдрэхэд ойр зам нь ичих. Ичээхийн тулд үнэний нь хэлэх хэрэгтэй.
, , , ,
Сайн хүн авъяастай хүн хоёрын хайлш байж гэмээнэ уран зохиолч болно.
, , ,
Эдэлж үзээгүй торго мөрөн дээр эс тогтоно.
, , ,
Зочин ирэхгүй байвал урих хэрэгтэй. Онгод ч гэсэн зочин мэт аашилдаг.
, , ,
Yлгэр мэдэхгүй өснө гэдэг өнчин өсөхтэй ижил.
, , ,
Ухаантнууд амьдралдаа таньсан үнэнийг хүнд хэлж амжилгүй одохоос л айдаг.
, , ,
Д.Батбаяр