Энэ нь тус хөдөлгөөнийхний тэмцлийн зохион байгуулалт бололтой. Дээр дурдсан хугацаанд УИХ-аас өмнө нь тавьсан шаардлагуудынхаа хариуг авах аж. Хариу өгөхгүй бол Төрийн ордонд нэвтэрч төр, заегийнхантай уулзаж шаардлагынхаа хариуг биечлэн нэхэх бололтой. Ямар ч байсан тэд Засгийн газар огцорлоо, Н.Энхбаяр дарга та бүгдийг Чингис зочид буудалд хүлээж байна гэх мэтээр өмнө нь хуурсан МАХН-ынхны урхинд орохгүй гэдгээ Иргэний хөдөлгөөнийхөн хатуу мэдэгдэж байлаа.
Суулт хийж буйтай холбогдуулан тэдний эсрэг байгуулагдсан гэгддэг Хөгжлийн төлөө сонгогч олны хөдөлгөөнийнхнөөс уржигдар хэвлэлийн бага хурал хийлгэжээ. Ингэхдээ тэд Иргэний хөдөлгөөнийхнийг Ерөнхийлөгчийн сонгуулийн сурталчилгаа эхэлчихээд байхад энэ сонгуульд оролцож буй нэр дэвшигч рүү дайрсан гүжир гүтгэлэг явуулж нэр хүндэд нь зориуд халдаж байна хэмээн буруутгасан юм. Энэ мэдэгдлээ тэд Эрүүл нийгэм-Иргэний хөдөлгөөнийхөнд улс төрийн суулт хийсэн эхний өдөр нь буюу уржигдар гардуулахаар очсон боловч Эрүүл нийгмийн төлөөх хөдөлгөөнийнхний удирдлага тухайн үед байгаагүй учир хүлээн авч чадаагүй аж. Үүнийг Хөгжлийн төлөөх хөдөлгөөнийнхөн тухайн үед нь баахан улс төржуүлж байгаад буцсаныг уржигдар зарим телевиз мөн суржигнүүлэн мэдээлснийг Иргэний хөдөлгөөнийхөн үнэнд нийцэхгүй зүйл хэмээн няцаалаа. Ер нь тус хөдөлгөөнийнхөн улс төрийн суулт хийж байгаад олон хүн илт дургүй, үүнийгээ ил далд эсэргүүцсээр байна. Үүнд энгийн хувцастай цагдаа, эрүүгийнхэн болон согтуу хөлчүү хүмүүс тэдэн рүү дайрч довтолсон явдлыг дурдаж болно. Мөн Хөгжлийн төлөө гэх хөдөлгөөний дээрх мэдэгдэл ч үүнд орж багтана. Эрүүл нийгэм-Иргэний хөдөлгөөний ерөнхий зохицуулагч О.Магнай тэдний эсрэг байгуулагдсан гэх дээрх Хөгжлийн төлөө хөдөлгөөний өчигдөр, уржигдрын үйлдлүүдийг буруушаагаад Уг нь бид нийгмээ эрүүлжүүлэхэд юуны буруу байх вэ дээ. Иргэн бүр үүний төлөө байгаа гэдэгт бид итгэдэг. Тэгэхээр Хөгжлийн төлөө хөдөлгөөн нийгмийн төлөө бус хөдөлгөөний эсрэг байгуулагдсан болоод байгаа юм. Бид УИХ-ын дарга Н.Энхбаярыг авилгатай яагаад тэмцэхгүй байна, авилга өгөхөөр орсон хүнээ яагаад зарлахгүй байна гэдгээр түүнийг онцолсныг Хөгжлийн төлөө хөдөлгөөнийхөн эсэргүүцэж байгаагаараа тэд хэн бэ, хэний төлөө вэ, юуны төлөө үйлчилж байна вэ гэдгээ харуулж байна гэсэн юм. Эрүүл нийгэм-Иргэний хөдөлгөөнийхний хоёр дахь өдрийн буюу өчигдрийн суултын үсэр мөн л хөлчүү залуус ирж үймүүлжээ. Цагдаагийнхан авч явсан болоод төдөлгүй чөлөөтэй явуулчих юм. Хэзээ ийм байлаа даа гэж Эрүүл нийгэм-Иргэний хөдөлгөөний ерөнхий зохицуулагч О.Магнай арга ядсан байдалтай хэлж байлаа. Хэдийгээр гадаа дулаан байсан ч хөдөлгөөнийхөн хоёр дахь өдрийн суултдаа нэлээд дулаан хувцасласан байдалтай ирсэн харагдана лээ.

Б.БОЛД
(өдрийн сонин 2005-04-22 098)