-Юуны өмнө танд МАХН-ын даргаар сонгогдсонд баяр хүргэхийг хүсч байна. Хүлээн авна уу?
-Баярлалаа.

-Монголын улс төрийн нөлөө бүхий хүчнийг толгойлох боллоо. Цаг хугацааны энэ шинэхэн мөчийн сэтгэгдлээсээ манай уншигчидтай хуваалцахгүй юу?
-Юуны өмнө намайг дэмжиж, надад итгэл хүлээлгэн сонгосон намын их хурлын төлөөлөгчид, намын гишүүд, дэмжигчдэд талархаж байгаагаа илэрхийлмээр байна. Надад хариуцлагатай, нэр төртэй, бас хүнд ачаа оногдлоо гэж үзэж байна. МАХН бол Монголын нийгмийн хөгжилд өөрийн хүчирхэг нөлөөгөө үеийн үед үзүүлж ирсэн улс төрийн том хүчин. Цаашид улам нээлттэй, улам уян хатан бодлогоор нэр нөлөөгөө тэлэх болно. МАХН ард түмнийхээ эв эеийн барилдлагыг хангаж, ардчилсан тогтолцооны тулгуур зарчмуудыг ягштал баримталж ажиллана.
Намын дотоод амьдарлын хувьд ч анхаарч ажиллах, өөрчилж шинэчлэх зүйл бий. Гишүүдтэйгээ болон бүртгэлтэй дэмжигчдтэй ажиллах талаар нэлээн тодорхой зарчмуудыг намын их хурлын шийдвэрт тусгасан байгаа.
МАХН нээлттэй, ардчилалтай, ухаалаг бодлого явуулж, ард иргэдийнхээ аж амьдрал, улс эх орныхоо хөгжлийн төлөө урьдын адил ажиллах болно.

-Танд гадаадаас болон дотоодын ямар улс төрийн хүчнээс баярын цахилгаан ирээд байгааг сонирхож болох уу?
-Одоогийн байдлаар Социнтерний дэргэдэх Ардчилсан социалист залуучуудын холбооноос баярын цахилгаан хүлээж аваад байна.

-Дотоодын улс төрийн хүчнүүдээс?
-Өчигдөр намын их хурал дээр С.Төмөр-Очир дарга Эх орон намаас ирүүлсэн талархлын цахилгааныг уншиж байсан.

-Шинэ дарга жигүүрийнхэнтэйгээ хэрхэн ажиллах талаар хүмүүс сонирхож байгаа байх?
-Жигүүрийн талаар шинэ дүрмэнд нэлээн тодорхой тусгасан. Жигүүр бол манай намын л нэгэн эд эс. Жигүүр санаачлагчид бол манай намын гишүүдийн л нэг хэсэг учраас тэдэнтэйгээ ойлголцож ажиллах ёстой. Намын дотоод эв нэгдэлтэй холбоотой эмзэг асуудал учраас ухаан зарж ажиллахыг хичээх болно.

-Дараагийн хийгдэх алхам юу вэ. Таныг 65 дугаар тойргийн нөхөн сонгуульд нэр дэвших байх гэх таамаг хүчтэй яригдаж байна?
-Нөхөн сонгууль зарлагдаагүй байна. Намын их хурал ч өндөрлөөгүй байгаа шүү дээ. Их хурлаас намын бага хурал байгуулагдана. Тиим учраас энэ асуултад эцэслэн хариулт өгөхөд эрт байна.

-Гэхдээ намын нөхөд итгэл хүлээлгэвэл даалгавар биелүүлэхэд бэлэн биз дээ?
-Тиим даалгавар өгвөл татгалзах эрхгүй байх.

-Та бол манай хотыг найман жил нэр төртэй удирдсан мэр. Харин таны залгамжлагч хэн болох вэ?
-Энэ талаар би танд ямар ч мэдээлэл өгч чадахгүй нь.

-Н.Энхбаяр дарга таныг бараг шууд нэр заасан шиг. Та дараагийн хүнээ нэрлэчихэж болохгүй гэж үү?
-Тиим зүйл байхгүй. Хэдийд албаа өгөх нь ч тодорхой биш байна. МАХН боловсон хүчин ихтэй нам. Нийслэл хотынхоо ажил амьдралыг өмнөхөөс илүү аваад явчих хүн цөөнгүй бий гэж бодож байна.

-Баярлалаа. Танд амжилт хүсье?
-Баярлалаа.

(өдрийн сонин 2005-06-20 149)