Хоёр долоо хоног үргэлжлэх энэ тэмцээнд тив тивийн шилдэг багууд болох

2004 оны Азийн цомын аварга Япон
2004 оны Африкийн цомын аварга Тунис
2004 оны Европын аварга Грек
2004 оны Копа Америк-ын дэд аварга Аргентин
2004 оны Хойд Америкийн аварга Мексик
2004 оны Австрали, далайн орнуудын аварга Австрали
2002 оны Дэлхийн аварга Бразил
Зохион байгуулагч Герман гэсэн багууд өрсөлдөнө. Бразилын шигшээ Копа Америка-д түрүүлсэн ч Дэлхийн аварга гэсэн үүднээс Тив хоорондын цом-д оролцох тул аман хүзүүдсэн Аргентины багт энэ эрх нь шилжжээ. 2 жил тутамд нэг удаа болдог энэхүү тэмцээний өмнөх аваргуудыг таилцуулвал

1992 онд Аргентин
1995 онд Дани
1997 онд Бразил
1999 онд Мексик
2001 онд Франц
2003 онд Франц

Энэ жилийн хувьд гол өрсөлдөөн Бразил, Аргентин, Германы багуудын хооронд өрнөх биз. Мөн Грекийг ч бас тооцооноос хасч болохгүйг тэд Евро-2004-өөр харуулсан. Багууд 2 хэсэгт хуваагдсан бөгөөд А хэсэг(Герман, Аргентин, Тунис, Австрали)-ийн 1-ээр гарсан баг Б хэсэг (Бразил, Грек, Япон, Мексик)-ийн 2-оор гарсантай нь, Б-ийн 1 нь А-ийн 2-той тус тус шөвгийн тоглолт хийнэ.

Манай залуус Бразил,Аргентины шигшээг гарын 10 хуруу шигээ мэддэг.Дэлхийн аваргаар Японтой гайгүй танилцаад авсан.Германыг бас овоо мэднэ.Грекий Евpопын аварга болсноор нь таних болсон.Бусад 3 багийн xувьд хангалттай мэдээлэл төдийлөн байдаггүй.Иймээс энэ 3 багийн онцлогийг танилцуулья гэж бодлоо,таалан соёрхоно уу.

За ингээд Тунисын шигшээгээс эхлэе.Тэд хэдий Африкийн аварга болсон ч зурагтаар гаргадаггүй болохоор ямархуу тоглолттой багийг хараагүй байх.Ерөөс тэдний онцлог бол нэг сайхан нартай өдөр Бразилыг хүртэл эвгүйтүүлж мэдэх ч өөр нэгэн өдөр сулхан өрсөлдөгчдөө далаараа тавиулж ч мэдэх баг.Аль формтойгоор Германд ирж байгаа нь иx сонин байх болно.Тэд сүүлийн 2 ч дэлхийн аваргад шалгарсан.Мөн өнгөрсөн онд Нигер,Сенегал,Марокко зэрэг xүчтэй багуудтай тулсаар тивийнхээ аварга болсон.Францын дээд зэрэглэлийн клубт тоглодог бразил Сантос Африкийн аваргын өмнө тус улсын иргэн болсноор урд талд xүчирхэг болсон.Түүний ард мөн л нэг лигийн анд Беначоур зогсдог нь Тунисын шигшээгийн гол цөм болдог.Түүнээс ямар ч уед тун боломжийн дамжуулалтууд ирдгийг Парис сен Жермены өнгөрөгч улирлын тоглолтуудаас зарим нь харсан байх.Мөн хамгаалалтын баруун жигүүрт Аяксын мэргэжилтэн Трабелси байдаг ба түүнээс урагш дайрсан тоглолтууд цөөнгүй гардаг.Шигшээдээ ч тэр нэлээн хэдэн гоолыг бэлтгэж өгсөн.Тэдний бас нэгэн хучтэй тал гэвэл дөчин насыг шургэж,дөрөө дарсан ат болж яваа хаалгач Али Боумниел.Чухам тэр л тивийн аваргад багаа маш олон xэцүү байдлаас авч гарч байсан билээ.Тэдний хамгийн сул тал бол хаалганы урд байрладаг хэсэг.Тэрчлэн Сантостой зэрэгцээд гүйх болон түүнийг талбайд гараагүй тоxиолдолд орлох хүн бараг үгүй.Дасгалжуулагч Роже Лемег харин манайхан сайн танина,2000 онд Францын шигшээг удирдан тивийн аварга болж,жилийн дараа энэ тэмцээний аваргаар тодорч байсан билээ.Тэрээр шинэ багийг аваад шинэ цусаар сэлбэсний дотор Францад төрсөн олон залуус бий.Ихэнх тоглогчид нь Европын лигүүдэд тоглодог, тэд од нь гийвэл яаж ч мэдэх баг даа.

Одоо цөс иxтэй Мексик залуусын тухай өгүүлье.Барсагийн Маркуйз болон Бланког бүгд мэднэ.Харин бусад нь төдийлөн нэр нь Европт танил бус иxэвчлэн тэндээ тоглодог хүмүүс бий.Тэд олон жил Конкакафын шилдэг багаар яваа,сүүлийн жилүүдэд Америкийн xөлбөмбөг нэлээн өндөр түвшинд хүрээд байгаа ч тэд одоогоор тивдээ номер 1 хэвээр.Дэлхийн аваргын урьдчилсан тоглолтод 13 дараалан хожигдоогүй яваа нь ч үүнийг гэрчилнэ.Тэд тивээ төлөөлж германд ирж байгаа,үүний тулд 2003 онд тивийн аваргаар зочин болж орсон Бразилийг финалд ялж энэ эрхийг эдэлсэн.Туршлагатай хаалгач Санчез,довтлогч Боргетти,төвийн бүсийн Пардо нар дээрх 2-оос гадна энэ багийн гол түшиг тулгуур болдог.Манай залуус Луйс Фернандесыг сайн мэднэ,98 оны дэлхийн аваргаар үсээ сэгсийлгэчихээд л манаргаж байсныг нь санаж байгаа биз.Түүний шигшээдээ 35 гоол хийсэн рекордыг Бланко 30,Боргетти 29 гоолоор нэхэж яваа гэхээр энэ багт 2 гооны машин ажиллаж байгаа нь мэдэгдэж байгаа.Xамгийн гол нь тэр 2-ын нас нь харин олон жил тоглох хүслийг нь бага зэрэг хязгаарлаж буй.Мөн энэ багт 25 нас хүрч ид уе дээрээ яваа Фонсеса хэмээх осолтой довтлогч бий. Ингээд харахаар тэдний гол онцлог нь довтолгоо болж байна.Гэхдээ голын шугамд ч гэсэн бас муугүй,иргэнээ болгож авсан бразил Наэлсон тун дажгүй тоглолтыг харуулдаг.Тэдэнд тивдээ Америк,Коста Рика 2-оос өөр xүчтэй өрсөлдөгч байдаггүй нь нэг сул тал болж мэдэх талтай.Мөн багийн супер од Бланко дасгалжуулагч Ла Волпе 2-ын хоорондох түнжингүй байдал багт хүндээр тусч мэднэ.Маркуйзыг эс тооцвол бүгд нутагтаа тоглодог ч гадаадын хэдэн арван тоглогчийг лигтээ тоглуулдгаараа тэд бас бусад улсын хөлбөмбөгийн стилээс гадарлана. Мексикийн тоглолт хэзээд шаламгай,харууштай байдаг тул сэтгэлийн мухарт тэднийг томоохон тэмцээнд яваад өгөөсэй гэж бодож явдаг юм.

За Австрали.Бусад оролцогчдоо бодвол цорын ганц мэргэжлийн лиггүй улс.Гэхдээ словак ерөнхийлөгчийнхөө ачаар энэ намраас өөрийн лигтэй болж буй.1974 оны дэлхийн аваргаас өөр томоохон тив дэлхийн тэмцээнд ороогүй болохоор тэд ирэх жилийн дэлхийн аваргад орохын төлөө бүхнээ зориулж буй.Тиймээс ч тэд энэ удаагийн тэмцээнд тун өндөр ач холбогдол өгч байгаа.Соккероос-ын хамгийн нэрд гарсан тоглогч бол энэ оны аваргуудын лигийн аварга Кевелл.Гэхдээ түүнтэй өрсөлдөх нэгэн хүн гарч ирсэн нь Тим Кахилл.Премиер лигид 11 гоол xийж Эвэртоныг ирэх улирлын аваргуудын лигид багтаасан түүнд бас чамгүй потенциал бий.Мөн л Премиер лигийн легионер,Миддлсборогийн Видука ч гэсэн тун боломжийн довтлогч.Түүнтэй нэг багт тоглодог хаалгач Шварцер олон жил хаалга манасан туршлагатай тоглогч.Брюггетэй Белгийн аварга болж,өөрөө мэргэн бууч нь болж байсан дасгалжуулагч Франк Фарина Видукаг ганцааранг нь урд зоож,Кевелл Кахилл 2-ыг ялимгүй арагш нь татаж 4-5-1 гэсэн системийг эрхэмлэдэг.Австралийн шигшээгийн гол хөдөлгүүр нь төвийн бүсийн энэ 5 тоглогч.Туркт тоглодог Скоко,Пармагийн Бресиано,Блэкбурны Эмэртон нар энэ тавтыг бүрдүүлдэг.Тэдний тоглолтын бүх л бужигнаан эндээс эхэлдэг.Xарин ар тал тэдний xувьд тийм ч сайн биш.Зүүн талын 2 аль хэдийн 30 гарсан,тэрчлэн Видука гэмтлийн улмаас Миддлесбород олон тоглолт өнжсөн.Түүний байрлалд орлох хүн Австралийн шигшээд үгүй.Дасгалжуулагч Фарина сүүлийн уед гэрийн тоглолтоо Лондонд заримыг нь xийx болсон,энэ нь тоглогчдыг цуглуулахад амар байдагтай холбоотой.Хамгаалагч Моорэгаас бусад бүх тоглогч нь Европын нэлээн нэртэй клубүүдэд тоглодог гэхээр тэдний тоглогчдын муугүйг илтгэнэ.Ялангуяа ямар ч хүнийг чанаад өгдөг Англид маш олон тоглогч нь байдаг болохоор тэд ямар ч багт xүчтэй эсэргүүцэл үзүүлж чадна,гагцхүү тэр өдрийн од тэдний хувьд жаахан гийвэл болох нь тэр.

Л.Олонбаяр

/Спортын цонх/