Ерөнхийлөгч зохиолчдод мэндчилгээ дэвшүүлэв

Уг мэндчилгээнд Монголын зохиолчдыг удирдах, эрх ашгийг нь хамгаалах, уран зохиолын шилдэг бүтээл олноор төрөн гарахад зохиолчдын эвлэл багагүй ажил хийж, Монгол Улсын соёл, урлагийн салбарыг хөгжүүлэх, ард түмний оюун санааг гэгээрүүлэхэд Монголын зохиолчид ихээхэн үүрэг гүйцэтгэж ирснийг их чуулганы тань өдөр тэмдэглэн хэлэхэд таатай байна.
Монголын соёл, оюуны хөгжилд үнэлж баршгүй хөрөнгө оруулалт хийж ирсэн үе үеийн зохиолч Та бүхэн Монголын уншигчдын төдийгүй дэлхийн уншигчдын сонорыг мялаах олон шилдэг роман, өгүүллэг, шүлэг, яруу найраг, жүжиг, кино, орчуулгын бүтээлүүдийг туурвиж бүтээнэ гэдэгт итгэлтэй байна.
Монгол Улсын төрөөс утга зохиолын хөгжил дэвшлийг ямагт дэмжиж ирсэн бөгөөд цаашид шаардлагатай эрх зүйн болон эдийн засгийн орчныг бүрдүүлэхэд анхаарах болно.
Монголын зохиолчдын бүтээл туурвилын онгод хийморь бадарч, утга зохиолын олон өнгө аяс төгөлдөржин монгол хэлний яруу сайхныг дуурсгаж, монголын утга зохиолыг дэлхийн дэвжээнд хүргэх их аяны зам тань өлзийтэй байх болтугай гэжээ.

* * *

Мөн Монголын уламжлалт анагаах ухааны музей нээгдэж байгаатай холбогдуулан тус музейн хамт олонд мэндчилгээ дэшүүлэв.
Уг мэндчилгээнд Дорно дахины Анагаах ухааны хөрс суурин дээр төлжиж, түүнийг баяжуулан хөгжүүлсэн Монголын уламжлалт Анагаах ухааны музейг анх удаа нээж, хүн арддаа эртэн цагийн монгол анагаах ухааны түүхэн судрууд, эмт бодис, монгол оточийн өргөө гэрийн тухай танилцуулах буянтай үйлсийг бүтээгч Та бүхэнд чин сэтгэлийн мэндчилгээ дэвшүүлж, ажил үйлс тань өөдрөг байхын өлзийтэй ерөөлийг өргөн талбия.
Музейн хамт олон Монголын уламжлалт анагаах ухааныг сэргээх, сурталчлах, монгол эм, эмнэлгийн арга технологийг өвлөн үлдээхэд үнэтэй хувь нэмэр оруулна гэдэгт итгэлтэй байна хэмээн дурджээ.