Гэтэл МАХН-ын Удирдах зөвлөлөөс томилогдсон ХХАА-н сайд
Д.Тэрбишдагваар ахлуулсан ажлын хэсэг саяхан тус аймагт очиж аймгийн МАХН-ын хорооны хурлыг хийлгэн ИТХ-ыг төлөөлөгчдийг айлган сүрдүүлэх, дарамтлах, таван сая төгрөг амлах зэрэг хууль бус аргаар зарлуулах гэж байгаа талаар аймгийн МАХН-ын хорооны зарим гишүүн манайд мэдээллээ. Нийслэлээс ирсэн МАХН-ын ажлын хэсэгт тус намын гишүүн Ц.Оюунбаатар, намын хяналтын ерөнхий хорооны дарга Сүхбаатар, УИХ дахь МАХН-ын бүлгийн ахлагч Д.Идэвхтэний төрсөн ах Д.Оргил, Сити такси компанийн захирал А.Сүхбаатар нарын хүмүүс оржээ. Тэд бүхэл бүтэн нэг аймгийн нутгийн өөрөө удирдах ёсны байгууллага ИТХ-ыг ийнхүү хүчээр зарлуулан бузар булай хуйвалдаан хийж байгаад нутгийн олон түмэн, МАХН- ын гишүүд дургүйцэн эсэргүүцэж намын нэр төрийг унагаж улмазр төрд итгэх түмний итгэлийг хөсөрдүүлж байгаагаа зогсоохыг шаарджээ. МАХН-ын удирдах нөхөд үүнээс гадна эрүүгийн хэрэг үүсгэн шалгагдаж байгаа аймгийн Цагдаагийн хэлтсийн дарга Батмөнхийг намын нэрээр сүр далайлган мөрдөн байцаалтаас авч аймагт нь буцаасан байна. Батмөнхийг ийнхүү мөрдөн байцаалтаас оргуулан Өмнөговь аймагт аваачсан нь хууль бус хуралдаа бусдыг дарамтлуулан оролцуулахаар зэхэж байна. Батмөнхийг мөрдөж байгаа байцаагч нь ирж түүнийг баривчлан авч явах гэхэд нь аймгийн прокурор Баярсүрэн, нийслэлээс ЦЕГ- ын дэд дарга Болдбаатар зэрэг хүмүүс Батмөнхөд туслан аймагт нь үлдээсэн гэнэ.

Б.БОЛД
(өдрийн сонин 2005-07-07 164)