Олонхийн түрэмгийлэл Монголын парламехтад ийнхүү хэд хэд давтагдав.
Харин одоо Ц.Нямдоржийн атгаж байсан хуулийн салбарыг хэн залгамжлах бол гэсэн асуудал улстөрчдийн дунд таамаг болон яригдаж байна. Гэхдээ экс сайд шинэ албан тушаалаа аваад хамгийн түрүүнд Миний залгамжлагчийг мэдээж МАХН-аас тавина гэж ам бардам хэлсэн. Зөвшилцлийн Засгийн газар байгаа гэж хэлэхэд хэцүү, бас байхгүй гэж хэлэхэд ч хэцүү гэж өөрийнхөө ажиллаж байсан Засгийн газраа чимхээд авсан тэрбээр харин залгамжлагчаа МАХН-аас тодруулахаа урьдчилан мэдэгдлээ. Уг нь зөвшилцлийн утга нэгэнт алдагдсан. Тийм болохоор хуульзүйн салбарыг аваад явчих чадалтай, боловсролтой хүн хэрэгтэй гэж хүлээж байсан олонд энэ хариулт төдийлөн таалагдаагүй. Гэвч түний үг биеллээ олж байгаа тухай яриа Саарал ордноор нэг тарав. Бүр халаагаа өгөх хүнээ эрхэм сайд асан өөрөө санал болгосон гэнэ. Энэ нь УИХ-ын гишүүн, Хууль зүйн байнгын хорооны дарга Д.Одбаяр аж. УИХ-ын гишүүдийн олонх нь Засгийн газартаа хүргэн орчихсон энэ үед дахиад нэг төрийн түшээг сайд болоход гайхах нь хэрэггүй юм.
Д.Одбаяр 2000-2004 онд Дорнод аймгийн Засаг даргаар ажиллахаасаа өмнө Хуульзүйн яаманд газрын даргаар ажиллаж байсан, хуулийн салбараар мэргэшсэн боловсон хүчин гэнэ. Иймд 2004 онд УИХ-цын сонгуульд ялалт байгуулахад чуулганы танхимд орж ирэхэд Хууль зүйн байнгын хороог даатгасан гэх. Түүнд ажлын дадлага туршлагаас гадна намынха алидерүүдэд таалагддаг нэгэн чанар байдаг аж. Энэ нь хэн хүний эвийг олчихдогоос гадна эв нь таарахгүй бол хүний өөдөөс жинтэйхэн дуугарчихдаг зан гэнэ. Ийнхүү ХЗДХ-ийн экс сайд Ц.Нямдорж өөрийн залгамжлагчаараа Д.Одбаярыг зүтгүүлж эхлээд байна. Харин түүний энэ саналыг өнөөдөр болох МАХН-ын Удирдах зөвлөлийн хурлаар хэлэлцэх сурагтай байна. Удирдах зөвлөлөөсөө дэмжлэг авах юм бол Д.Одбаярын хувьд сайдын суудал ойрхон байна.

Б.Сэлэнгэ
2005.07.7, Монголын мэдээ