Хуралдаанаар Төрийн ордон, түүний орчныг тохижуулахтай холбогдуулан авах зарим арга хэмжээний тухай УИХ-ын тогтоолын төслийг хэлэлцэж байсан юм. Засгийн газар ирэх онд тулгуур төр байгуулагдсаны 800 жилийн их ойг тэмдэглэхтэй холбогдуулан Төрийн ордны өмнө талд Чингис хааны дурсгалын болон онгон шүтээний ёслол хүндэтгэлийн цогцолбор, ар талд монгол т өрийн тамга, бэлгэдлийн хөшөө байгуулах саналтай байгаа юм. Ингэхийн тулд Д.Сүхбаатар, Х.Чойбалсан, Ж.Самбуу нарын шарилыг Алтан-Өлгийд шилжүүлэн байруулах тухай асуудлыг шийдвэрлэж өгөхийг УИХ-аас хүссэн юм. Яг энэ асуудал өнгөрсөн өвөл гишүүдийн дунд багагүй маргаан дэгдээснийг уншигчид санаж байгаа байх. Уг төслийн талаар гишүүнд янз бүрийн байр суурь илэрхийлж байлаа. Гишүүн Д.Одбаяр,Чингис хааны дурсгалын цогцолбор барихыг дэмжиж байна. Гэхдээ нүдэнд үзэгдэж, сэтгэлд хоногшсон зүйл бүтээмээр байгаа юм.Магадгүй биднийг ингэж хөдөлж ядсаар байтал хятадууд Чингис хааныг минь өөрийн болгож мэдэхээр байна. Өвөрмонголын Ордост 35 сая ам.доллараар маш том цогцолбор барьсныг бид мэднэ. Нийслэлийн төв талбайд байгаа Д.Сүхбаатарын хөшөөг нүүлгэж оронд нь Чингис хааны хөшөө босгох ёстой. Дээрээс нь Улаанбаатар хотын нэрий гөөрчилж Чингис хаан хот болгомоор байна. Энэ бол ямарч хөрөнгө мөнгө шаардахгүй хэрнээ МУ-ыг дэлхийд сурталчлах алхам болно. Америкууд нийслэлээ Ерөнхийлөгч Ж.Вашингтоны нэрээр нэрлэсэн байдаг гэв. Түүний энэ саналыг гишүүн А.Цанжид, С.Ламбаа нар дэмжиж нийслэлийн нэрийг өөрчлөх ёстой, тэгээд ч их Чингис хааныхаа нэрийг шар айраг,архи төдийхөндээр ашигладгаа болих ёстой гэж байв. Харин гишүүн Р.Раш, Монгол шиг Ерөнхийлөгч, УИХ, Засгийн газар гурав нь нэг ордонд суудаг улс дэлхийд байхгүй. Муугаар ярихад гай болоод хэн нэг нь тэсрэх бөмбөг хаяхад гурвуулаа байхгүй болж мэднэ. Нэгэнт Төрийн ордныг тохижуулах гэж байгаа бол үүнийг ч бас бодолцох хэрэгтэй гэсэн. Төсөлд тусганаас үзвэл Д.Сүхбаатар, Х.Чойбалсан, Ж.Самбуу нарын шарилыг Алтан-Өлгийд нутаглуулж, тэр орчмыг хамгаалалтад авах юм байна.

Б.Түвшин
2005.07.7 Зууны мэдээ