Баяр наадмын үеэр Хүй долоон худаг руу зорчих тээврийн хэрэгслийн замын ачааллыг багасгах зорилгоор Улаанбаатар хотоос Хүй долоон худаг хүртэлх замыг бүх насны морьдыг барианд орохоос нэг цаг 30 минутын өмнө Улаанбаатар хотын төвөөс Хүй долоон худгийн чиглэлд, харин морьд барианд орсоноос хойш нэг цаг 30 минутын хугацаанд Хүй долоон худгаас хотын төв рүү нэг чигийн хөдөлгөөнтэй байхаар тээврийн хэрэгслийн хөдөлгөөнийг зохион байгуулсан байна. Мөн 2005 оны долдугаар сарын 11, 13-ны өдрүүдэд баруун болон хойд аймгуудын чиглэлүүдэд зорчих тээврийн хэрэгслүүд Улаанбаатар хотоос гарах, орох үедээ баяр наадмын үеийн нэг чигийн хөдөлгөөнийг баримтлахыг анхаарууллаа.
Нийт 80 мянга гаруй тээврийн хэрэгсэл энэ наадмаар замын хөдөлгөөнд оролцоно гэсэн урьдчилсан тоо гаргажээ. Энэ оны улсын үзвэр тооллогоор 75 мянга орчим тээврийн хэрэгсэл үзлэгт орсон байна. Харин хөдөө орон нутгаас 6000 гаруй машин баяр наадмын үеэр оролцоно гэж тооцож байгаа юм байна. Мөн жолооч нар Төв цэнгэлдэх хүррэлэн, хурдан морины барианы газар руу ирэх очих замдаа хурд хэтрүүлэх, согтууруулах ундааны зүйл хэрэглэн тээврийн хэрэгслээ жолоодох, нэг чигийн хөдөлгөөнтэй үед цувааг гүйцэж түрүүлэх, бусдын хөдөлгөөнд саад учруулах, газар тээврийн хэрэгслээ зогсоох, уралдааны морьд дагаж давхих, морь гарааны байр уралдааны замд тээврийн хэрэгслээ зогсоох зэргээр баяр наадмын үйл ажиллагаанд саад учруулахгүй байхыг анхааруулсан байна. Баяр наадмын үеэр ЗЦГ-ийн алба бүрэн бүрэлдэхүүнээрээ ажиллана.

С.ДЭЛГЭРМАА ( Өдрийн сонин 165)