-Цагдаагийнхан энэ жилийн баяр наадмаар хүч нэмэгдүулэн ажиллах гэж байгаа гэсэн. Хэдий хэр хүн хүч гаргах гэж байна вэ?
-Ардын хувьсгалын 83 жилийн ойн баяр наадмын хамгаалалтад дотоодын цэрэг болоод цагдаагаас 2900 гаруй хүн гарч ажиллаж байсан. Өнгөрсөн жилийн баярын өдрүүдэд хүнийг санаатай алсан хоёр, танхайн 16, эрүүл мэндийг нь хохироосон зургаа, хулгайн 16, авто ослын хэрэг 29 удаа гарсан байна. Энэ нь өмнөх жилийн баяр наадмын үетэй харьцуулахад 9.4 хувиар буурсан дүнтэй байгаа юм. Тэгэхээр өнөө жилийн хувьд хамгаалалтын хүн, хүчний тоог өмнөхөөс нь буулгалгүй, улам хариуцлага, эрх үүргийг нь дээшлүүлж
ажиллана. Цагдаагийн дээд сургуулийн сонсогчид болоод дотоодын цэргийнхэн хүч нэмэгдүүлж ажиллах юм.

-Аливаа гэмт хэрэг, зөрчил, ослын үндсэн шалтгаан согтууруулах ундааг хэтрүүлэн хэрэглэсэнтэй холбоотой гардаг биз?
-Тэгэлгүй яахав, өнгөрсөн жилийн баяраар гэхэд л Сүхбаатар дүүргийн ҮII хороонд оршин суудаг Ч.Отгонбаатарыг хамт архи ууж байсан Ц.Учрал нь зодож, тархинд нь хүнд гэмтэл учруулснаас амь насыг нь хохироосон золгүй хэрэг гарч байсан. Хоёрдугаарт, иргэд баяр наадамд яарснаас гэр орноо хагас дутуу цоожлон, тагт салхивчаа нээлттэй орхисноос хулгайн хэрэг их гардаг юм. Онцын шаардлагагүй бол өөрсдөө, үр хүүхдээ ч тэр бүр гол уе руу явуулахгүй байвал зүгээр. Өнгөрсөн жил гэхэд баярын өдрүүдэд 11 хүн гол усанд эндсэн хэрэг гарсан шуү дээ. Түүнчлэн бага насны хүүхдээ анхаарахгүй орхисноос есөн хүүхэд төөрч, тэднийг цагдаагийн ажилтнууд ар гэрт нь хүргэж өгч байсан.

-Сайхан баярлаж, хөөрч явахад нь цагдаагийнхан иргэдтэй их бүдүүлэг, ширүүн дориун харьцдаг гэсэн гомдол байнга гарч байдаг. Бүр наадам зохион байгуулах комиссын хун нь өөрөө ч нэвтэрч чадахгүй, цагдаагийнхны хүчинд автаад зогсч байна гэсэн яриа гарч байсан?
-Тиим бүдүүлэг, ширүүн дориун харьцаж байсан зүйл байгаагүй, байхгүй гэж боддог. Энэ жил ч бид хамгаалалтад гарах хүмүүстээ үүрэг тавихдаа энэ талаар анхааруулж хэлнэ. Түүнээс гадна иргэд, зохион байгуулагчид өөрсдөө зөвшөөрөлтэй хэрнээ цаг хоцорч ирчихээд, хөдөлгөөн хаачихсан хойно орох гэж зүтгэн манай ажилтнуудыг хүндрүүлдэг тал бий.

-Яагаад хүч нэмэгдүүлж байгаа юм бэ. Лав хотын хүн ам нэмэгдсэнтэй холбоотой биш байх?
-Урьд өмнө гарч байсан хэргийг бууруулах, болж л өгвөл гэмт хэрэг гаргахгүй байх, хамгийн гол нь иргэд хөдөлмөрчдийн аюулгүй, тайван байдлыг хангахын тулд л хүч нэмэгдүүлж байгаа. Түүнээс биш урьдчилсан ямар нэг мэдээллийн мөрөөр хүч нэмэгдүүлж байгаа юм биш шүү.

С.ЭНХТУУЛ
(Өдрийн сонин165)