Уухай хашгирах наадамчид
Тасарч нэг, тодорч нэг сонсогдоно…
Урагш зүтгүүлэх ташуур
Энд ч нэг, тэнд ч нэг мэдрэгдэнэ

Дөрвөн мөч бадайраад
Тушаатай мэт гацна…
Дөрвөн уулын дунд
Түрүүлэх Заяандаа омогшино

Монгол наадмын бахархал
Молор эрдэнийн Хүлэг
Мөнхийн хүрдэнд шидэгдэхээр
Хурдны зам дээр сөгдөнө

Хамар гэнэт цоргиод,
Өвдөг нугараад сульдах шиг
Yгүй, би өндийнө гээд
Хад чулуун доор дарагдах шиг

Дотор сайхан онгойгоод
Тэнгэр цэлмээд ирнэ.
Хөх Тэнгэр дээрээс
Хөнжлөөр хучих мэт ивээнэ.

Шантараагүй шандаст Хүлэг,
Сөгдөөгүй босоо Унага,
Алсыг ойртуулсан,
Аюулхайг чичэрүүлсэн,
Уухайн дуугаар бүрэлдэх
Уралдааны Монгол Морь.

Ай, хөөрхий Хүлэг мину,
Нулимстай мөнхрөх Ажнай мину

2004.07.09
Х. Эрдэмбилэг