Шинэхэн гавьяатаа өөд нь шидэж харагдана. Д.Ганхуяг гавьяат болжээ гэхээр Эзнээ олжээ гэж хүмүүс ярилцаж байсан. Нөхдийнх нь баяр хөөр ч үүнийг гэрчлэх мэт ээ. Төрийн ордны Бунхант индрийн орчимд зогссон хүмүүс шагнал авсан хүмүүсээ гарч ирэх бүрт баяр хүргэн хашгиралдаж, Сүхбаатарын талбай ер бусын жаргалтай өнгөөр туяарч байлаа.

Ерөнхийлөгч Н.Энхбаяр Нийслэлийн Ган гүүр ХХК-ийн даамал Н.Лхагвадоржид МУ-ын хөдөлмөрийн баатал цол хүртээж, Сүхбаатарын одон Алтан соёмбо тэмдгээр шагналаа.
Түмэн эх чуулгын гоцлол дуучин, СУИС-ийн уртын дууны багш Ц.Чулуунцэцэгт гавьяат жүжигчин цол, Нийслэлийн БГД-ийн Эрдмийн ундраа цогцолбор сургуулийн түүх, нийгмийн ухааны багш С.Цэцгээд гавьяат багш цол, Шашны их сургуулийн Зурхай ухааны тэнхмийн эрхлэгч Г.Пүрэвбатад урлагийн гавьяат зүтгэлтэн цол, Р.Сандалханд гавьяат тээвэрчин цол, УИХ-ын гишүүн Д.Дэмбэрэлд гавьяат эдийн засагч цол, Хууль зүй, дотоод хэргийн яамны төрийн нарийн бичгийн дарга Б.Цэрэндоржид гавьяат хуульч цол олголоо. Мөн Халдварт өвчин судлалын үндэсний төвийн зөвлөх эмч В.Пунцагт хүний гавьяат эмч цол, Монгол телевизийн редактор, сэтгүүлч зохиолч Ш.Гүрбазарт соёлын гавьяат зүтгэлтэн цол, Нийслэлийн СБД-ийн Эрүүл мэндийн нэгдлийн нүдний их эмч С.Манлайд хүний гавьяат эмч цол, ДБЭТ-ын гоцлол дуучин, СУИС-ийн дуурийн дууны багш Д.Ганхуягт гавьяат жүжигчин цол, Ховд аймгийн Дарви сумын Мөнгөн Аяга багийн малчин Д.Лхасүрэнд гавьяат малчин цол тус тус олголооо.

Хөдөлмөрийн гавьяаны улаан тугийн одонгоор УИХ-ын тамгын газрын ерөнхий нарийн бичгийн дарга Н.Лувсанжав, УИХ-ын гишүүн С.Оюун, Улсын клиникийн нэгдсэн П эмнэлгийн эмчилгээ эрхэлсэн дэд захирал Ч.Ухнаа, цэргийн гавьяаны улаан тугийн одонгоор ЗХЖШ-ын хэлтсийн орлогч дарга Д.Баянжав, Алтан гадас одонгоор Нийслэлийн эрүүл мэндийн газрын дарга Ц.Ганхүү, Өдрийн сонин-ын тоймч, сэтгүүлч Б.Ганчимэг, Мюзик саунд студийн захирал Б.Дашдондог, Монгол телевизийн нэвтрүүлэгч Д.Цоодол, С.Чимэгээ нарын хүмүүсийг тус тус шагналаа гэж Ерөнхийлөгчийн хэвлэл, мэдээллийн албанаас мэдээлэв.